魔西的入埃及記 day 7

樂蜀 Luxor -洪加達 Hurghada

今日5點鐘morning call離開樂蜀前往洪加達.  之前俾左錢遊紅海. 由於似乎未退燒的原因決定留番響陸地shopping. 身體狀態唔好暈船浪機會好高, 無謂博, 但真係非常可惜, 因為同行朋友話見到海豚!!!!

洪加達天氣十分好, 太陽勁曬.  第1日響阿歷山大港落雨落到水浸, 響cairo 就沙麈暴, 見到洪加達咁好天氣根本冇辦法可以想像到自己響埃及!  遊船河的團友分完房馬上離開酒店上船順便食埋lunch, 我地留守的人就要自己攪掂.  上到房, 有d 舊有d細, 但屬於可接受.  但個廁所真係太~~~~細喇.  我見到一個好似只得4格階磚咁大的東西, 而佢,就係我地沖涼嘅地方..... 另外馬桶正正對住洗手盆, 坐低解決時係需要側側身的......

超細的廁所. 我成晚坐響廁所, 個人都不能坐正, 只能側側身....左圖那個白
的東西, 唔係洗手盆, 係"四格浴池!!"

小休一會就出去買手信同埋搵飯食. 離開房間由走廊露台望出去:OMG! 我未見過咁靚的海! 再上天氣好簡直真係仙境一樣! 我今日見識到真正的藍天白雲.  靚x 100000!!難怪洪加達會成為歐洲人的渡假勝地.

從未見過咁藍的海!!!!! ichiban! 仲有唔同顏色的藍

響酒店發現一件事.  之前響CAIRO 見到好多告示都係用阿拉伯文, 英文, 法文, 間中有D 德文甚至日文寫的. 但黎到洪加達我發現除左酒店之外, 商店都會用俄文. (係, 冇錯, 其實我識俄文!)   後來領隊話, 好多俄國人會黎紅海渡假, 特別係潛水.  難怪響街見到D 外國人都會發現樣貌同之前見到的唔同: 淺金髮, 高, 比較壯, 個樣非常cool.

沿途好多好多的手信店, 比起開羅的手信店冇咁大壓逼感.  唔會有人冤魂咁響後面跟住之後one dollar one dollar 咁煩住曬.   仲搵到一間手信SUPERMARKET, 明碼實價, 唔洗講價咁鬼煩!  而且可止冇人冤魂咁跟住, 直情冇人理過我.....卒之就響呢間店買左3個香水樽咁大把!  但迷你金字塔同埋俾人落order 要買的金字塔鎖匙扣就未搵到! 要番去開羅再搵!

響太陽底來來回回咁搵野食, 都冇乜0岩心水.....天氣好熱我覺得我又發燒...最後竟然不自量力地食burger king.(點解不自量力? 一陣就知,....咁過癮食burger king 吖拿)  我坐近玻璃窗的坐位有一個細路女隔住玻璃指住我d 薯條好似好肚餓咁.  我指下d 薯條再指下佢, 唔知點解講左句廣東話"你想食, ?" (講完先覺得自己戇居). 個女仔點點頭.  反正我都食唔曬咁多, 我就留起差不多一半俾佢.  我一邊食一邊見到佢同另一個大佢少少的女仔同一個細路響街邊行乞 (其實佢地表面上係賣玩具, 但0個d玩具邊會有人買) 自己就響度大啖大啖食burger king, 心裡叫左一句: "呀!!!資本主義!!!!! 但我真係好幸福"不過同時亦有少少難過...... 出門口交包薯條俾佢, 佢馬上就同另一個女仔大啖食, 好似十日冇食飯咁樣..後尾撞番佢地3個跟住一個後生仔, 我估佢地應該係俾一個集團操控行乞, 真係好淒涼....咁細個就冇得番學要行乞....港童真係幸福~

熱到發瘟的番到酒店又開始唔舒服.  第二樣唔會咁快見效,食錯野一定馬上現眼報.  明明又痾又發燒未好番竟然食burger king + 薯條+ 可樂!  咁爽, 當然就係馬上嘔!  嘔完一輪覺得舒服左, 又再小休一陣, 換條短褲就去左酒店後面個海灘行下.

差不多4點, 個太陽又差唔多準備落山又開始有涼意.  行到海灘望下個海, 清清楚楚的見到有魚游來游去.  未見過d 水咁清, 海會有咁多唔同層次的藍色!!   唔游水都浸下腳, 紅海喎!!!  我對腳浸過紅海水架!

魚!魚!魚! 好多魚!

酒店後的海灘.  身後的不是紅海, 係海灘中間無啦啦有個湖的物體

行行下撞到幾個團友, 吹吹下水突然有人叫我地---見到另外有一對團友響望海大露台向我地揮手! 向海露台??????? 我地間房望住後樓梯架喎???  同我吹水的團友問我, "你地間房係唔係向海呀?  我地間套房都向海, 不過冇佢地對到咁正囉" 吓???????? 套房?? "你要唔要黎我地間房玩下呀??" 去, 梗係去!!

離譜呀!!!下面就係團友間房呀!!! 廁所有浴缸, 仲有廚房, 又露台面對紅海仲有客廳呀!!!!!  點解咁架!!!
嬲嬲地響佢地廁所洗腳!! 洗到一個浴缸都係沙 XDDDDD

人地個露台!! 向住紅海架

之後食飯問一位單人匹馬的男團友, 佢話佢間房有....3張床!!!!!!!!!!!!!!!!!!  一個人3張床!!!! 領隊剛剛行過聽到問我地乜事咁嘈我地話俾佢知我地四格浴池的事.  佢話係d 房係酒店俾佢, 佢都唔知會咁...仲問我地要唔要同佢換房.  唉, 費事麻煩..乜鬼野都拎曬出黎又洗埋頭...一晚半晚就算啦...
雖則我地黑到爆分到間東堤小築房, 呢間酒店本身好大, 可能佢地好彩分到d房剛剛番新過啦....但我側側身響廁所肚痾睇左成集康熙來了真係好辛苦~
值得一讚係佢地個自助晚餐同早餐真係款式多味道好! 其實我冇乜點食到晚餐, 因為食唔到...不過睇下都知道好食! 早餐個麵包海非常壯觀, 好多不同款式味道的danish pastry, 冒住肚痛的風險都食左幾個!

上圖係我地間房, 下圖係人地個廳

我地間房望出去個view

今日領隊話有團友提議明天番到cairo 重玩金字塔. 佢同公司商量緊可行性如果人多可以試下安排．結果全團只有一對夫婦冇興趣!!!點會冇興趣架!!???? 於是領隊決定會幫我地安排, 因為兵分兩路要安排一架大車俾我地, 又要再俾入場費, 所以要quote下價, 明天就會知道.  而我地去金字塔就冇時間食LUNCH.  我聽到有團友話, US 50 都會去! 我都係咁話!  咁多錢都俾左, 唔差在50蚊!  見唔到金字塔點可以話自己黎過埃及!

入埃及記 day 6--中暑, 發燒了!

自費坐熱汽球-孟農神像 The Colossi of Memnon- 帝皇谷(法老王陵墓) Valley of the Kings-哈克米爾女皇大殿Deir Al-Bahri ~Temple of Hatshepsutel--喀納克神殿Karnak Temple-樂蜀神廟 Luxor Temple

一日痾7,8次都仲未夠掃興, 呢一日加埋中暑發燒, 但今日行程超緊密, 點解要咁樣折磨我!!!!!!!!!! 
由於我地選擇自費坐熱汽球, 今日要4點半起身.  天黑黑摸黑出發, 先要落船再轉駁艇去另一個地方集合升空.  我覺得有d 似一大班人半夜偷渡的感覺.......
駁艇上吃過早餐就要簽生死狀.

一大班人好似半夜偷渡

一個一個熱汽球準備升空, 天色亦開始光!


get ready!




準備升空了!

  控制熱汽球的職員會將汽球一時升高一時降低.  望落地下真係有d 腳軟!!  不過真係好興奮.

我地最高! 幾靚!! 下面就係帝王谷



日出!好壯觀!!



十個靚!

當熱氣球降落的時候, 有兩架貨van 的工作人員衝埋黎幫手,  場面就好似古惑仔衝落車一樣非常壯觀! 突然覺得咁多人去服待我地覺得呢百幾蚊美金俾得好抵!

幫我們降落的壯漢們, 正在收拾

番到酒店一班坐完熱氣球的團友馬上九秒九的衝去食早餐, 好似一班餓鬼!
食完早餐有一段空檔時間,  我亦趁呢個機會又一次去"排毒".....
今日的情況咁多日最差, 曾經有諗過唔再落船留響船休息. 但諗下諗下一於同佢搏一搏!!!! (好彩搏到.....否則真係好大鑊!)


去帝王谷之前, 先到了孟農神像Colossi of Memnon.  領隊在車上介紹我卻因為肚痛完全聽唔入耳.

下一站:  帝王谷 The Valley of the Kings. http://en.wikipedia.org/wiki/Valley_of_the_Kings

 入面嚴禁攝影. 只能在車上拍低外面的樣子. 

早上坐熱氣球時, 著左好多好多衫, 而且都已經第6日, 日日都覺得涷, 所以決定著番上午的同一套------立即中招~!!!

帝王谷位於吋草不生嶙峋的山脈之間 (睇相就見到,一條草都冇).  我番到香港睇書, 先知道古王國時期的法老王興建金字塔陵墓的慣例, 而新王國時期就會在山谷間尋找隱密葬區, 呢個葬區就係帝王谷.   帝王谷目前發掘出約64座陵墓.  開放參觀的只有幾個.

入場後領隊先向我地介紹帝王谷歷史, 我已經開始有D 頭暈.....  後來領隊帶我地睇左三個法老王的陵墓-Ramusses 4世 和九世, 同埋 Merneptah.  要入去陵墓必定要經過一條密布浮雕的長廊, 深入地底的主幕室.  由於長廊深入地底所以都好長好斜行得好辛苦. 而且人又多, 冇可能停低慢慢欣賞牆上壁畫因為會阻塞交通. 

因為壁畫未冇經過陽光照射所以顏色都仲保持到.  影唔到相, 但你地有興趣可以入呢度睇下:

KV2: Rameses IV

http://www.thebanmappingproject.com/sites/browse_tomb_816.html

KV 6: Ramese IX

http://www.thebanmappingproject.com/sites/browse_tomb_820.html

KV 8: Merenptah

http://www.thebanmappingproject.com/sites/browse_tombimages_822.html

http://www.culturefocus.com/egypt_valley-of-kings.htm

最出名的圖坦卡門法老王陵墓(tomb of Tutankhamun) 響1922年響呢度被發現.  由於要另外再俾錢, 我地就冇入去睇.  況且佢個黃金面罩同好靚的陪葬品都響開羅博物館, 我地遲d番 cairo 就會入去睇.http://www.thebanmappingproject.com/sites/browse_tombimages_876.html

空氣唔流通+天氣奇熱+太陽直曬+ 樽水太少一早飲完= 中暑.  到最後行屍走肉的行完上車死屍一樣....



帝王谷



下一站:  Deir Al-Bahri-Temple of Hatshepsut

身體情況去到呢度已經不能再差..... 點解神殿個名會又Deir Al barhri 又temple of hatshepsut ?領隊係有講, hatshepsut 1 係邊個都有講. 不過就係企響大大個太陽下面講, 曬到抽筋完全唔知佢講過乜!

我只係見面有好多女學生, 去左埃及咁多日好似未見過有咁多女性!!!

放眼望去盡是女學生

 

天氣好到冇雲

當時已經缺水中暑了......好x熱

捱過呢一關終於可以上車番上船休息一陣........食過飯抖一抖, 出發去下一個景點前例牌又要上幾次廁所.  我從未想過, 食止痾藥係要4個鐘食一次(仲要麻麻地有效).  從來只有食頭痛藥先會食得咁密架啫! 以前食止痾藥通常食兩次就足以令人便秘3天或以上!

下午第一個行程:  喀納克神殿 (Temple of Amun at Karnak)

我個人認為呢個神殿同埋下一個Luxor Temple 絕對精彩, 只可惜我冇辦法細心欣賞.  實在非常可惜! 呢個temple 好大, 佔地超過100公頃.  有好多好靚的雕像,石柱,全部非常值得欣賞的古物, 最搶眼的就係一排獅身羊頭像同方尖碑..  太大地方太少時候太差身體狀況.  最記得除了一排獅身羊頭像之外, 就係響入面不停搵一張"啫神"的照片送俾一位朋友!!!






搵左好耐先搵到張未被破壞的啫神浮雕, 送俾你, wing!



獅身羊頭像, 第一塔門

Luxor Temple(http://egypt.go2c.info/temple/luxortemple.htm)
呢個神殿其實是可以通往之前那個喀納克神殿 (Temple of Amun at Karnak). 入面有好多拉姆西斯神像.


美麗的黃昏景色



 下午又熱又曬,太陽一落山就涷..., 一到黃昏抓毛又要出動.  笑都笑唔出, 行都行唔郁. 發燒中!!! 只係想早d番上船.  本來仲想去行夜市, 但真係冇辦法撐落去.  跟車番上船馬上食退燒藥瞓到晚飯時間.   呢幾晚的晚餐,  就係麵包麵包麵包麵包麵包.....



拉姆西斯二世



曾經被破壞, 隱約見到天主教的壁畫

唔通真係1877年的graffiti???

食完飯執拾行李, 因為明天會離開遊船去紅海.  之前報左名出海睇珊瑚, 由於發燒都係決定退錢唔去. 實在非常可惜. 

食完藥昏昏入睡.

最痛苦的一日旅程完結, 總算無驚無險.

1 Hatshepsut是埃及上有名的女王.  父親是tuthmosis I, Hatshepsut 嫁給繼位的哥哥Tuthomosis II為妻.  在成為寡婦前並未生育皇子. 因此Hatshepsut輔佐庶子繼承皇位.  不過未幾不甘只為皇后的Hatshepsut即展露野心奪取皇位, 自立成為法老王.  為了樹立權威Hatshepsut以男裝示人, 她穿起法老王的纏腰布, 並戴起假鬚, 憑著驚人意志力及侍臣的忠心建立起專屬的政權.  Hatshepsut 在位34年.

 喀納克神殿 (Temple of Amun at Karnak)

http://www.ancient-wisdom.co.uk/egyptkarnak.htm
http://www.discoveringegypt.com/karnakb.htm
http://egypt.go2c.info/temple/karnak.htm

Luxor Temple
http://www.sacred-destinations.com/egypt/luxor-luxor-temple