入埃及記DAY 9-DAY 10-完結篇 (終於完成了)

開羅Cairo -> 杜拜 Dubai

旅程已經去到尾聲, 今日終於要走喇.   朝早5點Morning  call, 由於同行朋友早上例必起身洗頭沖涼所以基本上未到morning call 我已經會醒.  突然間"隆"一聲, 房燈閃一閃, 冷氣又熄左一下, 之後突然間所有事又回復正常.
又會咁都有...間酒店咁鬼靚都可以發生d 咁0既事? (仲有, 到離開酒店之後我地先至發現其實係冇morning call 過我地...好彩朋友要起身洗頭否則真係訓到遲大到就尷尬)
呢間酒店個早餐真係好正, 都係同一句--我唔敢食.  九日我痾左六日, 仲點敢亂食野呢? 最痛苦的就係, 我地今晚book 左大拿拿美金196的buffet dinner, 我都覺得我冇可能暢快咁亂食野!!! 天呀, 成千幾蚊架....完全浪費金錢, 蝕大本!

去到開羅機場上左飛機坐低曬, 遲遲未起飛..等呀等呀, 等左個幾鐘都未起飛. 攪咩呀????  點知等等下仲叫埋我地落機, 似乎係架飛機有事. 
就係咁, 我地成機人就坐響開羅機場坐左4個鐘......我地逗留響杜拜其實就只得半日.  有團友book 左玩沙漠四驅車的已經注定要cancel.  我地呢d book左buffet 的, 唔知趕唔趕得切...............
趕唔到咁點呀? 有冇得回水呀?????
響等候期間, 機場人員推住一車汽水同礦泉水派俾我地,  都算做幾好啦.. ..之前我已經拎左一支水, 到後來那個機場職員再派到俾我地我就冇再要...佢竟然塞罐汽水俾我仲擺出"要啦, 要得唔好side 嘛" 的表情,  非常攪笑!

delay 4小時終於上到機.  飛機到達杜拜時導遊同我地講, 希望大家可以合作, 一陣落飛機過海關時大家動作快少少, 爭取時間--因為我地食buffet 係有時間限制, 我地已經遲左好多, 佢幫我地爭取左可以遲少少去, 希望所有團友合作d 幫幫手等我地可以早d 去到, 又可以食耐d.  而唔食buffet 的團友去shopping 都可以行多少少時間, 因為我地當晚會搭飛機去曼谷再飛番香港.

於是大家都非常合作, 全程都係用小跑的步伐去海關, 連團中最大年紀的兩個阿伯都行得快過我!  奇蹟地大家竟然可以響35分鐘過左海關, 連平時最麻煩經常離隊唔知去邊的團友都乖乖地企左響度! 上到旅遊巴, 大家都忍唔住要拍手讚自己!

burj Al Arab

旅遊巴先停Dubai Mall 放低shopping 的團友, 再車我地幾個去食buffet的人去Burj Al Arab酒店. 六星級酒店果然不同凡響, 連去酒店都要Permission. 入到去當然係要＂嘩~嘩~嘩~＂咁叫啦。
點知去到餐廳食buffet 時, 大家都有d失望.  可能我地香港人實在太幸福喇, 香港d 酒店buffet 相比之下實在又平又靚.  全晚最好食係生蠔, 細細隻但非常鮮味.  我只食左兩隻, 因為怕肚痾.  吞拿魚扒都好正, 食條放響度等你自己切. 要幾厚有幾厚! 甜品, 只有一款蛋糕好食d. 其餘的真係乏善足陳.  每個人都有d 失望......只好安慰自己: 黎呢度都係食名食裝修啫......

http://www.jumeirah.com/en/Hotels-and-Resorts/Destinations/Dubai/Burj-Al-Arab/Restaurants-And-Nightlife/Al-Iwan1/

快快手食完呢餐又到集合時間, 大家都要廁所參觀下六星級酒店個廁所有幾豪華.
最豪華咪就係支hermes hand cream.  London Harrods 百貨公司個廁所豪華過佢多多聲.

我地食完Buffet 就去番Dubai Mall 接番d團友, 坐夜機番bangkok.  一到dubai mall 全部冇去shopping 的人闖入dubai mall, 影相留念!

整個旅程, 就響一個反高潮之下結束. 之前對於呢個buffet 真係有非常大的期望.  原來, 做人真係對任何事/人唔好有咁大期望會開心d.
最離奇的事就係, 我一離開左埃及之後, 冇再肚痾, 一直由杜拜到曼谷再回到香港. 一粒藥都冇食過, 一次都冇痾過!  一落機拖住個行李仲要去左茶餐廳飲左杯奶茶以慰相思之苦!!
十天埃及"病壞"之旅, 就此完結.  一個充滿很多痛苦又難忘回憶的旅程.  (你估咁多人可以見到亞歷山大港水浸同開羅沙塵暴架?)

入埃及記 Day 8

洪加達(Hurghada)-> 開羅(Cairo): 埃及博物館(Egyptian Museum),舊開羅 (Old Cairo)

今天坐飛機離開洪加達番去開羅.  導遊有好消息--就係開羅天氣好好, 而佢地都可以安排我地再去金字塔一次!!  由於行程緊湊我地再去金字塔的話就冇時間食lunch, 但係我地全部都冇異議.  大家都屏息以待導遊話俾我地知要補番幾多錢----答案係十六蚊美金!(定係十八呢.....不過總之係平到笑!)
諗都冇諗過會平到咁!  呢個情況其實金怡要掠我地水掠到30蚊我估大家都應該冇乜異議, 但估唔到只係需要十幾蚊美金.....算係咁喇!! 於是我地一落飛機就直接去金字塔區.

到了洪加達機場. 一入門口給機場職員留難.  見到導遊面口好難睇, 原來係個埃及佬截停我係想攞"清涼油"!  我自己已經俾問過拎白花油, 原子筆, 連響機場都有職員藉D 意攞清涼油!!!埃及人真係生活得咁苦???!!!!!!

我在一邊休息, 團友們在另一邊聽緊導遊講野, 因為又在早上拉肚子了.......

行程緊湊,番到開羅立即開車去金字塔.  街上好多車d 人又亂泊車所以有D 塞車, 大家都有D 擔心.  見到街邊D 車係triple parking---原來係因為星期五佢地要去回教寺.  星期五響埃及係假期, 就好似天主教/基督徒星期日上教堂一樣.

 終於我地見到金字塔喇!!!! 天氣好好!

 見到3個金字塔了!!! 上次連一個都差d見唔到!

今次風和日麗

上次黃沙萬里



今次單衫一件



上次又冷帽又圍巾又外套都涷到留鼻涕

 大家都好開心好滿足的影完相, 開開心心的去開羅博物館.  埃及果然係埃及, 響博物館外面都見到不少古物隨處放. 導遊俾我地少少時間響博物館出面影相, 就將我地所有相機收起因為館內嚴禁影相.  估唔到開羅博物館又會咁嚴!

博物館的第一層入面擺左無數大型雕塑.  數目太多所以有d逼 但非常震撼.  因為人太多時間太短, 完全冇辦法可以慢慢欣賞,實在非常可惜. 我覺得最少要4小時先可以跑馬看花睇到一個圈, 但我地好似只逗留了兩小時.... 我地俾左一百埃磅去左第二層木乃伊館, 另外當然去左睇圖坦卡門的金面罩與其他陪葬品.   開羅博物館俾我的感覺有d 殘舊, 燈光陰暗, 某d角落直情係陰深. 但咁樣反而覺得佢歷史悠久更加有味道...但賣紀念品的商店卻是又新又光猛.
我只能講, 開羅博物館, 精彩!!!!!!! 非常精彩!!!!!!
我冇辦法用文字表達其精彩程度, 不過此博物館係每個人去到埃及除左金字塔之外的必到之地!!!
去完博物館我地就去趁墟---行市集是也!

今晚晚餐就係響市集自己搵食.  個市集好大,而且亦因為係假日所有好多人.  由於要買手信所以去左紀念品店講價...真係講到牙血出. 爛筆一支加上蜂蜜喉糖, 講價買了一堆鎖匙扣和一大堆石頭---迷你金字塔.  足足有8個!!! XDDDD(本來打算自己要3個, 最後番到香港越睇越中意, 自己留番起6個, 只係送左2個出去 哈哈哈哈哈哈哈哈哈哈)

導遊推荐我地去一間烤雞店食.  於是就走去試試.  其實間鋪頭睇起上黎真係有D污糟....但係肚餓又冇乜時間剩唯有試一試.  入到去要搭檯.  有個埃及阿叔好NICE 的指手劃腳的叫我個大背囊可以放埋一邊地下唔洗咁阻"定". 但個地下真係好污糟, 仲有隻貓行來行去......  所以就冇理佢.

我地搭檯的係一個埃及女人.  一而再再而三堅持讓位俾我坐埋埋邊放個袋落地下. 盛情難卻, 只好就範...我地ORDER了一隻雞, 見到女人食緊個餅, 我用手勢問佢"GOOD?" 佢馬上幫我地order 左一個!  好好人!! 去左埃及幾日只覺得d 小販好煩, 未見過一個好人, 呢位女士可以講係咁多日最nice的! 或者其實佢地本性並唔差, 只不過生活逼人吧????? 不過原來個餅係唔收錢, 好彩佢幫我地order!

那隻雞脾非常好食. 咁多日以來最好食就係佢. 一撕開, 雞油,肉汁一齊流, 肉質又嫩, 美味! 可惜食完雞脾就要食雞胸. 我慢慢一啖一啖"趙",但真係好難吞落肚. 直到摸二食完佢那一份我都仲未食完個胸....真係冇辦法吞得落...舊雞冇辦法過到我喉嚨.  唯有放棄, 但係又未飽喎, 馬上走到旁邊的一間鋪頭買kabab!

食完飯上車番酒店, 從車上面真係見到好多人行緊街!! 好似年三十晚行花市一樣!



人頭湧湧

 是晚酒店是dusit thai. 所以酒店lobby 好有泰國的感覺.

 房間好大.  從廁所可以望到房.

 房間入面有露台, 可惜入住的時候已經好夜, 乜都睇唔到.

明天就要離開埃及, 經杜拜番香港.  之前訂左去杜拜六星級帆船酒店食buffet, 可惜到第8日我仍然肚痾, 根本冇辦法可以開懷大吃...真係慘 :-(  大拿拿 美金195架!!!!!

6月30日 回香港了,最後一天在倫敦. 又再一次非常狼狽

今晚回香港了, 趁著最後一天在倫敦, 早上決定再遊大英博物館.  去年到過開羅博物館, 知道那一塊對於研究埃及歷史很重要的rosetta stone 原來就是當年我在大英博物館看過那一塊.  開羅博物館都只是得照片一張而大英博物館卻珍藏了真品.  09年到大英博物館時發現rosetta stone是放在埃及館入口位置而且無數人圍著拍照. 覺得應該是一件非常重要的文物卻完全不知道此塊石頭的重要性.  而且去完巴黎發覺所有博物館都要收入場費更加覺得欣賞英國的博物館不收費非常值得尊敬, 因為可以有更多的人能夠參觀 (是不是全部免費我就不知道, 但起碼我去了5間都不收費)

發現酒店附近有巴士直達大英博物館, 於是一早食完早餐便去等巴士.  在等候期間突然氣氛變得非常緊張. 我看見有兩個男人神情緊張的追著一個少女狂拍照.  是那種只有香港狗仔隊追星才出現的情況.   我見到那個少女完全沒有反應任他們拍照, 以為是在拍戲, 但我卻不見有任何攝影機.  似乎真是paparazzi 了.

巴士旁邊的兩個是狗仔. 少女是追蹤對象

後來少女竟然走上我想坐那架巴士.  我以為狗仔們一定會追上巴士, 又或者開車追.  怎料他們只是很緊張的跑到對面馬路, 對著巴士狂影..... 出乎意料地斯文.

斯文的狗仔.  窗中倒影就是那位少女

那名少女就坐在前面

 由於Oxford Street 修路, 所以非常塞車.  少女於是決定下車走路了. 

我望了好久好久,我都無辦法認得此名少女何方神聖.  不過以我在倫敦所見到的女子, 她算是略有姿色而且身裁高瘦的了. 可能是名人, 又或者是明星吧? 因為我見到在她走過一間商店時剛好有一個男人走出來.  當男人看到她時, 嘴巴張開一個大O!
塞車塞了個多小時, 終於來到了大英博物館.
雖然不收入場費, 但館方都希望參觀者捐錢幫助日後維修保養等等, 今次我決定捐出兩大英磅支持!!

這就是我今次的目的--Rosetta Stone

 

 另外我又發現這些木乃伊. 我好似上次沒有看過的??

在大英博物館行了一個圈, 肚餓了....在附近Tottenham Court Road繞了幾個圈, 決定吃新加坡食品! 這是海鮮LAKSA, 非常辣, 但頗惹味. 不錯~店裡在播張學友的歌,  明明收銀員在講廣東話, 但我向她說廣東話時偏要和我說英語............

吃飽飽去了Convent Garden, 又浪費了好多時候在找路....因為我堅持不坐車, 要用腳由Tottenham Court Road走到convent garden!! 在一個路口選擇轉左或轉右的時間又揀錯了....
行了一會好像沒什麼吸引, 我便去Oxford Circus 打算shopping.  去了topshop HMV等等 發覺沒什麼特別, 便回酒店拿行李, 再返回公司和同事們Farewell.

. 原來Convent Garden 都有Laduree的

去了M & S 作最後衝刺掃貨, 慢條斯理的到公司和同事們FAREWELL, 回酒店拿行李, 再去KING'S HEAD 和同事飲酒, 再慢吞吞的去機場.   八點多的飛機, 我過了六點才起程從Queensway 坐tube 再去Paddington Station, 我真不知道當時我為何會如此夠膽慢慢來.....
去到 Paddington Station, 我開始覺得擔心, 因為我忘了heathrow express 是十多二十分鐘才有一班開出往機場. 一到達機場我推著我的行李在terminal 狂奔!! (又一次狂奔.....)  到了check in counter 才發覺還有十分鐘counter 就要close了....雖然我已經在網上check in 但我還是要寄倉, 我實在太過份了.....check in 完還要去退稅, 發現退稅counter 的人龍最少有50人吧....我要退30 euro 呢...怎麼辦! 距離上飛機的時間有一個多小時, 在決定要放棄的時候有工作人員告訴我們在過海關之後還有一個退稅counter, 於是我就帶著同事要我帶回香港5kg 的handcarry La Mer 特別版 Cream 飛奔過海關.
(到了上飛機那一刻我才覺得我好像沒有過海關....因為我完全不記得有人在我海關蓋離境印呀! 只有我進入禁區前有一個女職員看過我的passport 一眼...是我慌得忘記了? 還是離境不需蓋印????)
到了security check 我才發現, 她那個cream 可能過不到, 因為可能超過100ml!!!! 我在那一刻怕得要死, 因為萬一給海關沒收我是要賠償還是不賠呀??? la mer 呢, 最少一千元港幣我怎麼賠? 那一刻我非常恨那一位要我帶這個5kg 禮盒裝特別版la mer 的同事, 因為她非常自私! 5kg 體積又大根本放不入行李, 為什麼會有人自私不完全不考慮別人感受? 而且我好像從來沒有答應過要幫她拿回來? 只是我剛好最後一天回公司她又知道, 就叫DHL 把東西寄到公司要我帶回來?
在排隊那幾分鐘我腦中就是不停在想這件事件, 急到要死....把東西放上輸送帶我心跳得好快, 突然輸送帶突然停了! 嚇死我!!!! 完全來是前面的人行李有問題要檢查他的.....最好還是安全過關, 我嚇了一身汗!
離開Security check, 尋求退稅counter, 又是排隊.  好彩見到前面有人突然好像發現新大陸的離開於是我又跟著去 (因為我認為我在這條人龍排的話應該趕不及上飛機, 決定憑直覺去博一博).
去到另一邊, 只需要等兩個便輪到我了.  很快速便在退稅表格上蓋了印, 可以把表格寄回去了.  之前我看過退稅表格, 寫得不太清楚. 到底正本表格要不要寄回去???? 我看有兩個台灣人也在準備把表格寄回的樣子便問他們是否要把正本一併寄回?  他們說可以不寄. 我聽了他們的話便把表格放入信封裡.  情急之下把信封也撕爛了.....
過了一個月, 我相信是應該把正本寄回去吧. 我到現在也沒有收到退稅.............難為我在heathrow 發瘋的在奔,
辦好手續, 發現差不多要登機.  我才想起其實我不知道退稅Counter 距離gate 有多遠....如果是超級遠的話怎麼辦!!!!!!!!!!!!!!
又再一次, 拿著5kg 的禮盒在倫敦Heathrow airport 怒奔!!!! 一直跑一直跑, 逢人過人, 我認真的感覺到腳趾已經有水泡長出來了因為好痛.幸運的是那個登記閘口在不遠的地方, 滿身大汗的找到閘口幾分鐘後就已經開始排隊準備登機.  由於要霸位放那個非常"阻定"的禮盒, 加上要拿免費報紙, 所以便馬上排隊.  終於, 終於一切順利的還拿了蘋果日報上了飛機! 雖然是全身在流汗腳又痛! 神經病,.....我真的不知道為什麼我可以攪到整件事這麼趕. 之前一天在巴黎已經試過一次, 還要在倫敦試一次!!! 到飛機起飛我才真的覺得可以放下心頭大石.............
所以事到最後到完滿解決.  而且還可以看到最後一個episode 的 america's next top model!  回程也是吃pasta, 還有一杯蘇格蘭出產的超級好味vanila 雪糕!