魔西的入埃及記 11/12/2010 day 2

Day 2 11/12/2010
阿歷山大港 (Alexandria) -法老燈塔遺址(The Pharos)-蒙塔扎夏宮 (Muntazah Palace and Gardens)-波比石柱 (Pompey’s Pilar)


一落飛機, 早上六點幾就展開一整日的行程. 我地響開羅落機, 先到酒店 Radisson blu 放低行李就出發到阿歷山大港 (Alexandria). 從旅遊巴車窗望出去, 沿途都係沙沙沙沙沙….. 領隊中途停車俾我地上廁所, 落車那一刻真係嚇左一跳, 氣溫竟然好低, 著左抓毛外套都有d 凍, 而且風沙好大, 吹落塊面都有d痛. 而個太陽都係矇查查, 天氣似乎唔係幾好.我初時都以為時間尚早, 太陽未完全昇起, 等多一兩個小時應該會好太陽…...卦?



我地先出發去蒙塔扎夏宮, 巴士沿著地中海海岸行駛. 從車窗見到d浪非常大, 大到好恐怖! 去到那座夏宮影相, 大風吹到我地企都企唔穩, 頭髮吹到亂七八糟, 又大風又大沙!! 比起之前響台北101室外觀景台大風幾倍, 企都企唔穩非常恐怖!

之後再停了圖書館(Bibliotheca Alexandrina)影左幾張相, 都係因為企唔穩又或者太大風隻手揸唔穩部機對唔到焦又或者吹到斜曬.

lunch 係食自助餐. 好多食物都叫唔出個名…因為佢地煮到一pat pat”而無法分辨…味道又唔可以叫做難食, 但就唔夠熱同埋煮法唔適合我.(本人最討厭任何’鞋”口的食物而埃及好多食物都係燒, 一燒就多數出事)

食完飯再出發去另一個景點. 位於海旁的法老燈塔遺址 . 沿途見到街道水浸差不多及膝, 好多商店都要關門休息. 由於旅行車的車身夠高先至免於死火. 初初大家以為係落大雨渠道淤塞去唔到水, 去到先發現原來係地中海的浪太~~~~~大, d 浪高過地平線湧左入阿歷山大港的街道. 我地領隊帶左咁多年埃及都未見過如此情況, 就連當地埃及導遊都係第一次見. 咁我地係唔係叫做好好彩呀?????? (原來之後仲好彩d都有呀)

雖然只在阿歷山大港留左一日, 但對當地人存有好感.  可能阿歷山大港係近年先開放, 當地人比較少見到外國人, 每次在馬路見到我地旅遊車經過佢地架巴士, 佢地會好熱情一路同我打招呼由車尾跑到車頭. 人人都笑容滿面.  法老燈塔遺址仲有細路女要同我地影相.  又係笑容滿面.  對比之後開羅見到人人黑口黑面, 一係成個奸商樣的感覺相差好遠.

我地只在車上隔住窗睇龐貝石柱(Pompey's Pillar). 導遊話要俾入場費入去睇唔係好值囉...既然佢都咁講大家就隔住個污糟到爆的車窗係咁影係咁影....

夜晚去了一間對住giza 金字塔的餐廳食飯, 對住金字塔食飯, 真係一世人都未必有一次呀!!!(原來仲有第二次架) 抱住顫顫驚驚的心情去食那個”雞扒”晚餐, 竟然係雞脾呀!!!!太感動喇!!!! 熟悉我的人都知我平生最憎食雞胸. 響埃及日日CHICKEN OR FISH, 每一日都抱住賭一鋪的心情去食飯!


忍不住叫左支sakara 啤酒賀一賀佢! 可惜支啤酒換左都仲係暖的….
聽日就係重頭戲---庫夫金字塔同獅身人面像喇. 5:30am點morning call 要早d抖!

魔西的入埃及記 10/12-19/12 Day 1

前言

先解釋這篇遊記的名稱由來:  魔, 是同行朋友的簡稱, 西, 當然是本人謝西嘉,
2010年最後的旅行. 第一次的長途旅行(上次training 唔算啦), 第一次到非洲…出發前充滿期待. 但此次旅程卻係有史以來最多災多難的旅行. 從未試過旅程去到一半就有exhausted 想番香港的感覺. 差不多每一日都有意外或驚嚇事件發生. 沙塵暴水浸又痾又嘔又發燒撞馬車壞飛機要轉過另一架因而Delay4小時, 攪到去杜拜的時間只剩2小時整團人一落機就響機場狂奔, 只花不到半小時全部36人已離開immigration(超快!!!!), 因為發燒冇坐船遊地中海未能見到珊瑚海豚, 在洪加達其他人住海景房我地分配到長洲東堤小築房企位浴缸只有4個階磚咁大, 仲未講休息3個月冇探訪我的姨媽突然在某日坐3個半小時長程車中途不能上廁所的那一刻突襲……

最早一日的morning call為3點, 最遲為6點15分. 需要的體力和精神比平時番工多十倍………….同行者全程大部分時間腦裡保持空白不停食瞓基本上好寧靜的旅程…… 埃及的神殿金字塔等等無疑係非常值得一看但已經謝到乜都冇心機睇……

以往去旅行搵旅行社, 離不開康泰永安東瀛遊, 今次去埃及卻揀了金怡假期. 點解金怡?
原因有二:
1. 金怡假期主打埃及團, 一個星期有兩團比其他旅行社密好多. 我地今次必定要12月10日出發, 冇其他旅行社可以配合到.

2. 金怡的selling point 乃係開羅到亞斯旺的一程坐飛機, 唔同其他旅行社的12小時火車冇得沖涼. 另外洪加達飛開羅亦係坐內陸機, 唔洗坐長程車. 咁樣坐飛機就當然會貴d啦, 但好彩揀左金怡, 否則以我痾足大半程的情況仲坐長途巴士就認真大件事!

當初去金怡假期報名, 對金怡的印象非常差,首先佢地只收現金/支票確實唔方便.  第一次去拎資料時的職員同埋第二次去報名時坐counter 的先生實在態度囂張, 全程表現不耐煩. 點知開茶會又撞正佢而佢亦表示帶團去埃及去左”五十幾次”, 當時心想如果佢係領隊就真係弊…… 非常幸運地領隊唔係佢… 我地領隊Patrick十分專業. 每日都好有耐性再三提醒morning call時間行李收集時間食早餐時間和上車時間, 集合地點亦三番四次的提醒又提醒而唔會表現不耐煩. 非常熟悉埃及的神話故事及歷史(不過聽極都唔記得). 最後一日亦多得佢的安排令我地如願以償不至於敗興而歸.

Day 1 10/12/2010 下午四點機場集合, 快速掃了團友一眼, 並冇單身俊男, 呢次旅行可以疊埋心水集中睇風景….

乘坐18:55 TG639飛曼谷機場, 8點多9點到埗後, 辦好登機手續響機場行左一陣, 00:50 乘坐MS961埃及航空從曼谷飛開羅.

\
(開羅機場)

埃及航空比較舊但座位尚算闊, 最差係電視唔響前面椅背囉……….不過鬼咁眼瞓都懶得睇. 第一日就響睡夢中完結.

那些一年兩次去泰國的瘋狂的年代--- 2004

2004年, 由識途老馬周小姐帶領我第一次到曼谷. 從此展開了那幾年的瘋狂年代. 一年兩次的旅行, 學泰文學泰拳......直到突然所有熱情退減.
2004年的兩次最谷遊, 只有極少量照片. 原因: 只掛著shopping.
由於事隔多年, 當年我還未有寫blog 的習慣, 所以去過什麼地方也不太記得.
寫blog 的好處乃是當我年紀大的時候可以讓我自己知道曾經去過那裡做過什麼事.....就趁現在還有少量記憶把它們寫下來.

2004年乘坐cx到BKK, 馬上打的前往Silom Holiday Inn. 小休一會由周小姐帶領到world trade (當年好像還叫world trade centre吧????還未變成大型shopping mall, 有點土土的)還記得那裡有個人妖姐姐賣頸巾圍巾, 儀態萬千過一眾女人!!!
3日兩夜, 去過的地方包括siam discovery, MBK, 一次泰式按摩, 一次spa, emporium, suam lum night bazzar, 翟道翟.. 都是最標準的行程. 所有事物都覺得非常新鮮, 所有大象的產品, 尤其是cushion 都想帶回香港. (最後都忍不住買的一隻泰絲大象公仔)
最深刻的印象是超便宜的日式料理, lemon grass 香味和平到笑的t shirt!

SUAN LUM 瀨吧沙



holiday Inn Silom

第二次是同年的12月, 和芬姨一同前往.  當年是匯豐銀行半賣半送的一個優惠--一位$788(機票未連稅)連 5日4夜酒店住宿!!!!
這個Package 入面可供選擇的酒店全部名聲差到不得了.  我未住過, 不知道有幾差, 於是選了位置比較方便的first hotel.
酒店門口, 竟然有隻狗肆無忌憚的在睡覺.  入到房間, 比想像中還好, 只是:
白形的牆壁有黑手印;
浴缸有漬水喉生銹
浴簾有漬
熱水壺沒有熱水
..................................

是次行程, 去了大皇宮, 其餘和上次幾乎一樣. 
食方面:  必吃的日本菜之外, 還吃了越南菜, 泰國菜, 意大利菜.

MBK 上面間戲院



First Hotel!!!



siam center 內的zen





因藥物影響而點了這個超貴鰻魚飯



2008/12/1 高雄墾丁海角七號之旅 Day 3

day 3

今日係最後一日, 行完那個春秋閣, 龍虎塔之後,將會有半日的自由活動!

領隊好醒目, 明知我地想有多d 自由時間, 所以叫我地早d morning call, 早d 行完規定景點,就可以自己行!
所以morning call 時間比之前一日仲早.....係6:00am!!!!!!!!!!! 但大家都冇異議!
那些塔呀, 閣呀, 都唔太吸引. 太似香港d青松觀, 虎豹別墅之類. 不過買了幾個封神榜角色手機繩送俾阿姨舅父, 好好笑~ 如果平少少我就會買齊一套, 可惜要130元台幣一個!

之前search 左好多info. 搵左好多地方想今日去, 但經過昨日行山冇左半條命同兩隻腳, 我能量值只剩低30%......3個半小時的自由時間, 點算??!!!
先去誠品睇下乜野環境, 誠品響三多商圈大遠百17/F (係大遠百, 唔係大遠百貨). 樓底好高, 空間好大, 好有氣勢. 我覺得好似一間大學的圖書館!
行左一個鐘左右, 肚餓. 由於我地唔係換左太多錢, 而且美食廣場又冇乜好食, 我地決定去食麥記.
"mine... 箱 支 包" (西爸的麥香雞包)
"瓶....apple pie" (唔知點解突然轉英文.....)
"天怨鄙煎箱niu 飽 tao 餐" (田園培根雙牛套餐)
很好, 經理好有耐性, 全部聽得明.
"er....er....鞋油, 禾腰彎na 個.....花卵......" (還有, 我要換那個....花輪)
經理好有禮貌, 大聲的重覆: "花輪嗎, 好"
突然覺得幾十歲人有d 尷尬.

花輪同學

不過, 後面有個女仔點餐時, 都係話"禾腰彎na 個....." 手指指的指住小丸子. 唔通人人都覺得唔好意思?
食完野, 我地決定分道揚鑣. 西爸選擇留守誠品. 我決定坐捷運四處行下.
高雄捷運比較新, 感覺上同曼谷的地鐵差不多, 靜過鬼!!!! 去到中央公園站落車, 成個車站得3個人! 而且班次極疏, 足足等十分鐘先有一班.
而且道路上的行車少, 行人又少, 到底是經濟差, 定係高雄就係咁靜呢?
我去了新堀江商圈行行. 我在娛樂百分百都聽過蕭敬騰講過會在"新堀江xxxx"的地方簽名, 我以為新堀江會好似台北新光三越那邊咁大. 點知完全唔係那件事!!! 可能我去左另一邊?? 那天我去的時間比較早(2 pm), 好多鋪頭仲未開. 但已經開左的鋪頭並唔見得好特別. 老實講, 仲有d 土......失望!

由三多商圈站->中央公園站-> 美麗島站再回程, 都差不多夠鐘集合. 臨集合先醒起未飲過珍珠奶茶, 飛奔去天仁買完再趕往集合, 比原訂時間遲了3分鐘(甚至不足3分鐘). 但全團人已經到齊等緊我一個....真尷尬.
剩下少少錢打算在機場用盡佢, 點知個機場細到....想買都買唔到.
回程班機唔爆, 我一個人坐開左, 奇怪在所有團友(包括其他團), 冇人搬去前面坐, 情願4個人逼逼夾的坐畢全程. 又睇多半次的"海角7號". (在墾丁回高雄已睇左 一次). 差不多到香港我又坐去另一個window seat, 俾我又見多一次月亮的微笑!
今次的行程, 留在墾丁時間短左d. 實在係冇辦法, 因為我對於其他團的行程唔多滿意, 滿意的又唔成團. 只能希望下次有機會自由行的時候慢慢再欣賞墾丁的景色. 至於高雄....一個墾丁的中轉站囉.

2008/11/30 高雄墾丁海角七號之旅 Day 2

DAY2

今天將會去墾丁. 由高雄去墾丁要兩個小時左右(應該係卦, 我冇計住)
差不多到墾丁的時候, 就會一路見到海. 水連天, 唔同深淺色的藍和綠, 好靚! 響巴士上隔住玻璃都忍唔住影左好多相.

越途都是海

途中經過福德宮, 導遊話係一間供奉土地的廟. 求簽好靈! 神婆我當然唔執輸求番支啦. 但導遊話, 呢度求簽都有特別規矩, 先要問聖杯. 問準先可以求. 只能擲3次,黑起上黎3次都唔得就今日唔準求.
咁嚴格??!!!!
好彩我一擲, 就擲到一陰一陽, 可以求得. 我當然係問幾時搵到工啦..........
簽筒同我地一向見到的唔同, 係好大個坐地的. 我在大簽筒一抽. "一號!!!!?????????"
我拎住支簽, 睇左幾次, "真係一號喎!!" 以我多年經驗, 我唔洗拎簽紙都知係上上簽啦.
古人係"漢高祖入關". 唔洗睇內容都知好到極. 希望係啦. 我真係好需要好運!

在福德宮, 有個滿頭白髮的婆婆, 用非常流利的日文問我"由日本黎架?" 那時候我突然想起海角7號呢部電影....

食左一餐普通過普通的海鮮餐就去貓鼻頭. 呢個景點我睇旅遊書都有介紹, 但唔知點解大部分香港旅行團都唔放入行程? 可能覺得香港人唔會咁無聊專登睇舊石, 而且附近乜都冇,唔順路去其他景點?

下一個景點, 是墾丁國家公園. ?? 行程紙好似冇架噃? 我當時心諗, 正呀, 多左個景點!! 點知, 係惡夢的來臨.....

無可否認, 社頂自然公園的一段路, 風景好靚. 好多蝴蝶, 不同種類的雀仔, 岩石形狀奇特, 值得一去. 可惜, 真係年紀大機器壞, 行到差d 死!!!! 太多的上落斜, 崎嶇不平山路, 仲要穿越極度狹窄裂縫! 窄過張保仔洞! 未行完我已經膝痛, 斜路對膝頭實在太傷! 不過團中有4位老人家真係勁, 行得快過我多多聲, 真慚愧.........
如果鐘意大自然, 墾丁國家公園係一個非常值得去的地方!

下一站, 鵝鑾鼻燈塔! 鵝鑾鼻燈塔, 在台灣的最南端. 在燈塔那邊其實係睇唔到海. 導遊又吞pop 唔帶我地行. 我同老豆只好兩條友去搵那個台灣最南點的雕塑. 兩個腳痛之人急急腳向下行, 行左10分鐘仲未見到海本想打退堂鼓. 但老豆話, 到啦到啦, 見到海喇!!! 我才留意到有海浪聲!!!! 急急腳衝落去, 一轉彎就見到一望無際的太平洋/巴士海峽!!!! 我真係忍唔住發出 "嘩!!!!!!!!!(比起我在台北見到7-11大聲好多 XDD) 海呀! "

老豆話 呢度係太平洋和巴士海峽的交匯, 所以我地見到的海浪, 左右兩邊真係唔同樣架!!

雖然最後都係冇時間搵那個台灣最南的雕塑, 但我相信我已經到左國境之南. 由於已到集合時間, 腳痛父女唯有再匆匆回旅遊巴. 有少少可惜...
由於呢一團唔會留在墾丁過夜(CHEAP 野係咁架喇), 我地架巴士經過恆春古城俾我地睇一睇就出番高雄六合夜市食飯.中途落車去廁所, 咁橋身上有相機影左呢張難得的天文現象.

六合夜市和士林夜市唔同. 六合響街邊掃街, 所以一D 都唔似上次去士林咁侷咁熱. 好彩今次阿媽冇去, 否則佢一定發28次脾氣都搵唔到野食......搵左好耐, 卒之搵到間似樣D 的鋪頭仔食牛肉面, 加多杯苦瓜汁清清熱!
是日行程太辛苦, 九點左右番到酒店都攰到唔想郁! 實在唔能再行其他SHOPPING CENTER, 但又唔甘心咁早訓, 點算呢? 好彩俾我見到酒店附近有書局和屈臣氏!!!!!!老豆自己番房休息, 我就繼續行左一陣, 買左本書, 幾塊MASK 就番酒店.(係, 又係mask)
半夜突然熱醒,訓唔到. 典典下竟然肚餓....餓又訓唔到, 只好起身食餅. 一睇個錶, 4:30AM.....可能嘈到老豆, 佢起身見到我響張床食餅, "肚餓呀?" "係呀...." 佢竟然冷笑一聲!
之後第二日我問佢"尋晚你4點半見到我食餅, 有冇以為我鬼上身呀"

夜市入面有豬賣

十分喜歡台灣的白玉苦瓜汁

<