首先, 當你發覺被偷去財物, 無需要浪費自己時間去警局報案. 因為警察唔會幫你落案. Oxford Street Primark 的manager 叫我到最近的Charing Cross 警局報案, 我用google map 加上問咗好多個人(10個有9個人唔知警局響邊, 我最後在紅綠燈前截住一架警車先問到) 去到之後, 被一個當值嘅阿婆教訓完我一餐(點解你帶住passport 出街? 你酒店冇夾萬? 你知唔知歐洲地方唔需要帶身份證明文件出街?) 乜乜七七講咗5分鐘, 最後話"well, 我呢度幫你唔到, 你照住個網址上網report 啦. 番酒店慢慢攪" 之後遞咗一張紙俾我, 叫我自己報案. 當值阿婆仲話, "你帶咁多錢出街? 你知唔知倫敦係"city of pickpocket?"
番到酒店我同個網搏鬥咗好耐. 最後發覺係完全廢嘅. 因為佢上面叫我去/https://www.immobilise.com/ 而Immobilise 係俾有Serial no. 嘅物品如手提電腦, 電話, 相機等等報失用. 我唔見嘅係現金同護照, 所以不適用. (我今日寫呢篇文章時發覺網頁有d 地方同我當晚睇嘅唔同. 一陣再講.) 最後因為太夜, 我只好whatsapp 我倫敦同事, 請求佢明天番公司幫手睇吓我點樣可以報到案, 雖然明知一定搵唔番, 但我要claim 保險, 點都需要一個報案number.
記住呢個電話: 入 境 事 務 處 協 助 在 外 香 港 居 民 小 組 24 小 時 求 助 熱 線 (852) 1868
第二日倫敦時間早上8點幾, 我香港朋友打呢個電話聯絡入境處, 將我情況轉告再留低我英國電話. . 一位主任立即打長途電話俾我, 向我了解情況, 攞咗我簡單個人資料. 馬上將資料send到倫敦中國大使館. 叫我今日去儘快去辦領臨時證件. 好彩我星期六番香港而當時只係星期四, 仲趕得切. 不過大使館只在早上9am-12pm 辦理簽證, 所以要快d 去喇. 在遠方聽到一把冷靜嘅聲音仲係講廣東話, 我當時極度焦慮嘅心情的確係馬上冷靜咗少少.
我問主任, 咁我要唔要報案number 先可以辦證呀?
主任都唔清楚, 叫我自己問一問大使館. 於是一到九點正, 馬上打電話到大使館. 我將情況講一次,接電話的職員話, 唔需要報案number. 直接去就可以, 而且佢已經收到由香港入境處send 過去嘅資料.
辦理臨時簽證需要證件相一張以及38英鎊 (因為快證)
可以先到大使館遞交申請表再去影相.(因為只開9-12) 大使館職員會話你知邊度可以影相. 不過好! 鬼! 貴!!!!!!! GBP 10 得4張!!!!
仲有, 最好自己影定一張身分證副本(前 & 後) . 可以在大使館影嘅, 但要準備散紙. 我就係因為冇散紙所以在大使館內乞求其他人俾錢我....嗚嗚嗚(要知道我全部現金被偷呀一個pence 都冇....我都係公司俾住幾十鎊緊急救濟金我用咋)
交咗表又交咗相. 等咗一陣職員就叫我去COUNTER. 因為入境處一早俾咗資料, 我只要簡單講多一次情況, 最重要就係要講兩日後番香港要做快證, 職員就俾咗張收條我, 叫我明天黎取證就可以走喇.
過程極快, 完全冇阻滯!!
第二日番去取證, 在cashier 見到....唔收信用卡????? 唔係話???? 我唔夠錢喎????點算?
口窒窒問職員"你....你們不收信用卡嗎?????"
職員:"你的卡是那裡發的?"
我: "英國柏克萊銀行" (是公司卡喇)
職員: "那可以."
所以, 請記住, 去旅行要將護照和現金分開放!!!!!! 你不幸地唔見護照兼且冇埋現金, (即係我咁), 但你又冇英國信用卡, 你係俾唔到錢架!!!! 除非你香港信用卡可以提cash, 但我唔知自己信用卡密碼囉 LOL
於是我最後順利咁拎咗個臨時證番到香港喇. 因為我騰雞, 驚出境會有阻滯, 所以回港那日一早到機場退稅+CHECK IN. 退稅那邊完全冇問題, 只說一句Passport 唔見咗就繼續辦理. 國泰的地勤就要我出示香港身分證睇咗一陣, 但都一切順利.
好喇, 寫咗一大堆, 來個總結先. 先聲明, 我今次在倫敦唔見咗護照. 其他地方點處理我唔清楚.
1. 當發現唔見咗護照, 先聯絡香港入境處 (852) 1868. 等佢地先向倫敦中國大使館通報. 但唔通報得唔得呢? 我唔知喎. 因為我當日一早打電話去大使館, 職員查電腦搵到我資料之後叫我馬上趕去. 而去到之後我又再講多一次入境處已有通報嘅時候感覺好似成件事好smooth, 好辦好多咁囉.
2. 辦理緊急證件時無需要報案的reference number. 直接去大使館就可以. 下面係UK Metropolitan police 網頁寫嘅. 但當日我見唔到囉.......
3. 唔好浪費時間去警局報警喇.. 廢嘅. 警局西面當值阿婆叫我去report 果條link, 又係廢嘅. 因為我唔係唔見電話電腦嘛. 我有試過將passport number 當做serial number 咁report, 但係去唔到最後個step 架. 又冇make 又冇serial number, 點攪啫? 而且要我聲稱自己lost, 唔係俾人偷喎, 我鬼知咩? 大佬我唔奢望你幫我搵番d 嘢, 我只想要reference number claim 保險啫. 簡單d 得唔得呀?????
4. 最後我英國同事決定幫我 Report a crime. 填好呢一份表就會有一個reference number, 咁可以俾保險公司喇. 一日之後, 英國警方就會回覆email 話冇疑犯, 個case close 喇. (第二樣嘢唔見咁快)
保險公司嘅文件都係上星期先交. 因為係公司嘅plan 所以要交去英國, 而家都唔知可以賠到幾多.....
倫敦治安真係好差. 要小心財物. 我所有同事知道我在Oxford Street 遇到扒手個樣完全唔surprise. 我睇當地報紙都見到不少入屋行劫兼打屋主一身嘅案件. 屋主仲係八,九十歲老婦!! 今日亦有朋友嘅朋友在倫敦KFC 被偷去電腦電話銀包損失超過5000英鎊!!!
最後, 老土d 都要講: 冇乜特別, 唔好帶護照出街喇. D 錢分開幾個地方放, 唔好放埋一齊!! 好彩我香港身分證同公司Credit card 放在第二個銀包而那個銀包冇事咋!!!
仲有仲有, 帶一張護照影印本去旅行. 你唔知幾時會用到佢架!! 我電話有護照copy, 在公司print 咗之後帶咗去大使館. 雖然我覺得冇的話都一樣會issue 個快證嘅. 但佢地又真係問我有冇copy喎.
嗱, 呢個就係我個價值38英鎊嘅證件喇.
大使館職員話有3年限定, 但我唔知乜嘢地方可以用得著? 香港入境處職員話只係俾我用黎緊急入境囉....
