魔西的入埃及記 day 5

亞斯旺Aswan- 甘奧寶Temple of Kom Ombo-鱷魚神索貝克Soberk Temple-荷力斯神廟Horus Temple--伊斯娜Esna/樂蜀Luxor

充滿意外的埃及之旅今日終於遇到最恐怖最難忘的事!!!
經過之前一日3am morning call, 今日終於可以瞓到5點喇....皇恩浩蕩呀!
身體虛弱冇啖好食的進入第二天的遊船之旅.  早餐之後, 到了kom ombo後落船去了temple of kom ombo. 此廟供奉了兩個神: 鱷魚神和鷹神harqeris 又稱為horus. 每一日導遊講左好多神話故事我冇一個記得...最記得只有鷹神horus. 因為造型趣緻是也!! 

我地隻船

Temple of Kom Ombo

 

經過多年風吹雨打, 壁畫上的顏色仍然鮮艷!  據我阿爸阿媽話, 呢個神廟原來有一條好大好大的鱷魚木乃伊, 但我見唔到, 番到香港先知道確實有d可惜. 不過算啦, 鱷魚木乃伊的話, 開羅博物館而及大英博物館都有得睇!

響神廟的壁畫上, 見到好多當年埃及人用手術的工具.  包括手術刀, 骨鋸, 牙醫器材等等.  樣貌同我地今時今日的非常相似. 

當時的埃及人已經知道最好的分娩方法是"踎"響度

左邊的是鷹神, cute!

離開temple of kom ombo,  上船再前往下一個目的地.  好辛苦的忍住肚痛終於可以上番船鬆一口氣...

遊船駛到Edfu, 我地會登岸到鷹神廟temple of horus.  我地一落船就安排左我地4人一架馬車去神廟.  沿途非常混亂, 汽車馬車爭路非常危險.  導遊一早講明叫我地唔好俾tips 馬伕因為佢已經俾左錢.  我地架車的馬伕係兩個小男生.  一上車就問我地係唔係chinese japanese 之類的例牌對白企圖攞tips.  我忽然發神經回應左一句: "i'm from thailand!  sa wa dee kar!"  兩個小朋友馬上安靜, 我地4個大人就馬上爆笑! (根據同行朋友睇完呢個blog 之後話我當時係扮韓國人講com sa a me da!)

沿途見到有d 團友好似好醒咁坐響馬伕旁邊坐, 點知突然隻馬痾屎噴到個身十分狼狽XDDD

馬車慢慢地向著神廟進發, 突然發出巨響, "砰"一聲停左落黎.  我地響車上等左一陣見咁耐都唔郁覺得唔妥, 於是落車望下發生乜事.  唔望由自可, 一望嚇到鼻哥窿都冇肉.  我地隻馬仔瞓左落地!!!! 唔知道到底係前面架taxi 急停隻馬因此停唔切撞上去, 又抑或taxi倒車撞到佢跌低都唔知. 我只知道我地4個嚇到暈不附體!!! 老實講我真係唔敢望, 因為我好驚見到血! 當時我覺得真係好內疚. 如果隻馬真係因為載我地發生意外死左, 或者斷腳(最後應該都會落得人道毀滅) 我真係一世唔安樂!!

我地4個人企響條街, 唔知道周圍d 人講乜唔知到底發生乜事, 隻眼"稍"到隻馬瞓響地, 唔知點樣去到神廟同其他人會合, 見到其他團友架馬車行過又幫唔到手, 混亂間又有埃及佬行埋黎兜搭生意, 太陽又曬天氣又熱, 我又痾到虛弱無力......除左驚恐我唔知道可以有乜野形容詞去形容我地當時的心情.  而且仲俾我地見到架的士嘗試開車點知扯住隻馬, 隻馬俾佢拖住行左掙扎的恐怖場面, 我地當場大叫!! 驚到相都冇影過一張!!!

後來領隊和當地導遊馬車終於出現, 佢地馬上安排我地上左另一架車去鷹神廟, 我地仲未驚完, 擔心隻馬有事.....

鷹神廟 temple of Horus

到達神廟, 又曬又熱,  導遊加埋幾個團友合演一齣"短劇" 講俾我地知鷹神HORUS 的出身. 算係咁多日以來聽得最明白又入腦的一個故事. 可惜而家都係唔記得....記得的情節都係阿哥細妹一家親結婚, 之後又殺害又報仇又重生諸如此類.....

荷魯斯像. 由黑色花崗岩雕成.  頭載代表上下埃及的雙王冠

回程我地仲擔心隻馬會點樣, 話口未完就見到同一架馬車同埋那兩個小朋友等我地番碼頭上船! 太好喇!!! 起碼我地唔洗帶住一世內疚的心情離開埃及! 馬上補番張相先!

馬車. 右邊兩個小朋友就係我地個"司機"

上船休息食DINNER 之後參加左遊船舉辦的PARTY. 一共有兩個表演; 一位是身型大隻肥肥的肚皮舞孃, 另一位係表演不停轉圈的舞蹈 迴轉舞(Sufi Dancing).  呢位先生一開始就係咁轉係咁轉, 轉足十幾廿分鐘, 簡直神乎其技! 我睇都睇到有D頭暈想嘔, 我估佢都應該練左好多年!  睇完SHOW, 又再痾左幾次先瞓覺.....唉.

靚到震的尼羅河日落景色

魔西的入埃及記 Day 4

DAY 4  阿斯旺Aswan -亞布新布神殿 (Abu Simbel)

之前一晚十一點幾先瞓, 今朝3點鐘就morning call……..
由於太早酒店準備左一個breakfast box 俾我地, 一共有6個面包一杯yogurt! 咁早點食到咁多野呀…但原來個breakfast box 係俾我地食一日架, 因為來回abu simbel一共7小時車程, 6個面包剛好醫肚!!

巨型的breakfast box

由於呢一段車必須由軍隊開路. 所以我地連同其他團的人一定要到指定地點集合.

去神殿單程需時3.5小時.  車程太長, 所以司機都有兩個! 一個負責去程一個負責回程.  仲有一個軍人坐左我地架車一齊去.  訓醒好多次都未天光, 見到司機逢車過車速度超快都有d擔心. 都係大覺訓冇眼睇.差不多5點幾見差不多天光, 大家都拎個breakfast box 食野, 等睇日出.  太陽來來去去都係同一個, 但每天有機會睇日出都係咁期待同興奮……..

途中本人突然肚痛, 心諗自己咁大劑又肚痾?????? 坐下坐下又覺得此痛不同彼痛....唉…….果然係, 手術前那一支針的效用就在此結束.  親戚決定要陪我遊埃及!!!

包括其他團, 所有人都需要在此集合等待軍隊帶路. 圖中見到持槍軍人經過

日出了, 又一日!

abu simbel有幾偉大壯觀唔多講, 睇相都見到. 神殿入面唔可以影相, 壁上的雕刻亦栩栩如生. 3千年前喎, 咁樣的手工簡直係非筆墨可以形容咁勁啦. 最攪笑都係一個身穿傳統服飾守門口的埃及大叔, 見到我地兩個中國人樣, 主動問: Hong Kong? 我地答完”yes” 之後, 佢兩隻手捽住額頭”雲精”, 字正腔圓的講”白花油”……….埃及人實在太窮, 完全唔會放過任何一個機會去問人攞錢攞筆攞白花油的機會.

由於肚痛關係(及接踵而來的病痛), 本人從呢一日開始完全跌WATT, 對所有景點已經失去欣賞的passion……….而同行者卻一連十日都keep 住無比興奮的心情, 成為極大對比.

拉姆西斯二世雕像

神殿盡頭聖壇放左4個神像. 左至右為Ptah, Amun-Ra, 拉姆西斯二世, Ra-Horakhty.  每年10月20日及2月20日, 陽光會穿越前廳射入聖壇, 光線卻只會射在右邊3個神像,最左邊的冥神ptah依然隱在陰暗中.

第一多柱廳雕像

而家為左保護文物, 神殿內已經禁止攝影. 父母幾年前去仲可以影的.  以上兩張係係老豆的作品

俘虜浮雕

納芙塔蒂神殿 temple of Nefertari

此神殿於阿布辛貝神殿旁邊, 是拉姆西斯二世為愛妻納芙塔蒂所興建. 4座拉姆西斯二世和納芙塔蒂雕像嵌入正面斜壁. 納芙塔蒂的size 和拉姆西斯二世一樣大. 證明了拉姆西斯二世對妻子十分重視.

納芙塔蒂神殿 temple of Nefertari

離開abu simbel之後, 都係好早未夠鐘食飯..下一個景點係大水壩.  冇乜特別, 個心只係一直想快d去廁所!!!

水壩

去完呢個景點, 我地就上遊船了. 未來幾日我地都會響船上食都訓.  好彩咋, 因為就係呢一日開始我就病喇.  食完lunch 安頓好之後, 自費參加左坐帆船遊尼羅河.  初初出發都幾好, 風平浪靜都幾好feel, 點知回程時太陽落山, 氣溫立即低幾度(我估最少5度).  冇風加上逆流我凍到震騰騰好似受難一樣!!!! 幾經艱辛番到埋岸立即衝上房加衫再出發行夜市. 我突然覺得自己怕冷的程度已經去到全團無人能及的地步.
從未試過行街行到發火, 自己一個人喃喃自語講粗口, 響埃及係第一次. d男人不停叫人買野, "你好你好"見你冇反應咩就轉講日文: "konnichi wa, kawaii..." 煩到死呀!!!!!!!!!!!!!!!!!
睇中一樣野又要出曬牙血講價, 睇中左個布袋用幾蚊美金買左之後呻笨!!!不過到最後都未見過有同類型布袋賣, 條氣先順番d.

房間內, 每人一件救生衣

尼羅河

日落的尼羅河

阿斯旺night bazzar

遊船上的伙食....不能算差但亦不能算好. 要醫飽肚絕對冇問題0既. 想要食唔"鞋"的肉, 有難度.....

晚上據行程會有遊船員工的民俗服飾party, 食完飯歇一歇走去霸位睇睇, 點知等左半小時完全冇野睇. 偷聽到隔離日本團領隊與船上職員對話表示已經cancel!! 因為船員唔想開party!!! 完全唔通知咁都得!! 卒之日本領隊走上台用日文(只用日文講)party 已經取消喇, 但團友們你地可以出黎舞台跳舞~~~因為好多日本女人戴曬頭飾準備開party 架, 領隊怕團友鼓譟唯有俾佢地跳舞下下火…..我就發揮我的日語聽力翻譯俾其實團友聽, 大家唯有冇癮地番去房睇悶電視...........

魔西的入埃及記 Day 3

DAY 3 開羅(Cairo)-無名英雄紀念碑(沙達總統墓) (Unknown soldier/Sadat Tomb)-薩卡拉梯形金字塔(Sakara Step Pyramid)-吉薩金字塔(Giza Pyramid)-獅身人面像(Sphinx)-亞斯旺(Aswan)

天未光5:30 am morning call, 食完早餐上車先日出. 出發到名英雄紀念碑，大風吹到流鼻水, 好凍好凍, 好後悔冇著羽絨…. 而且風又大吹到頭都痛. 不顧形象最緊要唔好冷親馬上用頸巾包住個頭扮亞拉伯人! 凍到唔想周圍行, 影相又吹到影乜都斜左….
咁樣的天氣, 都幾大件事….

下一站到最古老梯形金字塔的STEP PYRAMID. 落車只見到一片黃沙, 什麼金字塔都只係隱約見到個影!!! 原本響呢個金字塔仲可以遠望到另外兩個在附近的彎曲金字塔和紅色金字塔, 可惜太大風沙連影都睇唔到…..其實仲勉強見到梯級金字塔係唔係應該叫好彩??
食完沙我地去左個皇室權貴的陵墓, 每個人都要彎低腰經過一條好窄的通道行入去, 墓內見到好多壁畫依然仲有好多顏色, 好神奇!!

之後便出發到重頭戲最出名的吉薩金字塔和獅身人面像! 但係天氣差到不得了, 落車影相只影到沙, 天色啡黃只能隱約見到金字塔個影. D 風一陣一陣的吹埋曬眼都擘唔大! 每一張相都只能在每一陣大風之間的空隙快手快腳影, 食風食到七彩, 當時心情可謂跌到谷底….俾左萬幾蚊黎睇金字塔而家只能食沙同吹風!!! 好失望! 之後到獅身人面像天氣好番少少, 但仍然係好大風! 騎完駱駝便去了另一間`可以見到金字塔的餐廳食LUNCH , “鞋”魚OR”鞋”雞之間, 不幸地我選了”鞋”雞……

看到個金字塔嗎

去完金字塔同獅身人像, 成面沙....用紙巾抹完面好似做去磨沙, 塊面痛左幾日....

是晚坐夜機到亞斯旺(Aswan), 明天會去另一重頭戲 –阿布辛貝神殿(Abu Simbel).
飛機略略delay, 到達亞斯旺已經八點多, 去了麥當奴買晚餐之後馬上回酒店沖涼洗頭. 從來未見過洗頭出來的泡泡係啡黑色……過左兩次水d 頭髮先至梳得順....好得人驚….

超細的阿斯旺機場

充滿阿拉伯風情的套餐

明天morning call為3點(!), 因為要在4點前去指定地點集合由軍隊護送我地所有旅遊巴到阿布辛貝神殿.

魔西的入埃及記 11/12/2010 day 2

Day 2 11/12/2010
阿歷山大港 (Alexandria) -法老燈塔遺址(The Pharos)-蒙塔扎夏宮 (Muntazah Palace and Gardens)-波比石柱 (Pompey’s Pilar)


一落飛機, 早上六點幾就展開一整日的行程. 我地響開羅落機, 先到酒店 Radisson blu 放低行李就出發到阿歷山大港 (Alexandria). 從旅遊巴車窗望出去, 沿途都係沙沙沙沙沙….. 領隊中途停車俾我地上廁所, 落車那一刻真係嚇左一跳, 氣溫竟然好低, 著左抓毛外套都有d 凍, 而且風沙好大, 吹落塊面都有d痛. 而個太陽都係矇查查, 天氣似乎唔係幾好.我初時都以為時間尚早, 太陽未完全昇起, 等多一兩個小時應該會好太陽…...卦?



我地先出發去蒙塔扎夏宮, 巴士沿著地中海海岸行駛. 從車窗見到d浪非常大, 大到好恐怖! 去到那座夏宮影相, 大風吹到我地企都企唔穩, 頭髮吹到亂七八糟, 又大風又大沙!! 比起之前響台北101室外觀景台大風幾倍, 企都企唔穩非常恐怖!

之後再停了圖書館(Bibliotheca Alexandrina)影左幾張相, 都係因為企唔穩又或者太大風隻手揸唔穩部機對唔到焦又或者吹到斜曬.

lunch 係食自助餐. 好多食物都叫唔出個名…因為佢地煮到一pat pat”而無法分辨…味道又唔可以叫做難食, 但就唔夠熱同埋煮法唔適合我.(本人最討厭任何’鞋”口的食物而埃及好多食物都係燒, 一燒就多數出事)

食完飯再出發去另一個景點. 位於海旁的法老燈塔遺址 . 沿途見到街道水浸差不多及膝, 好多商店都要關門休息. 由於旅行車的車身夠高先至免於死火. 初初大家以為係落大雨渠道淤塞去唔到水, 去到先發現原來係地中海的浪太~~~~~大, d 浪高過地平線湧左入阿歷山大港的街道. 我地領隊帶左咁多年埃及都未見過如此情況, 就連當地埃及導遊都係第一次見. 咁我地係唔係叫做好好彩呀?????? (原來之後仲好彩d都有呀)

雖然只在阿歷山大港留左一日, 但對當地人存有好感.  可能阿歷山大港係近年先開放, 當地人比較少見到外國人, 每次在馬路見到我地旅遊車經過佢地架巴士, 佢地會好熱情一路同我打招呼由車尾跑到車頭. 人人都笑容滿面.  法老燈塔遺址仲有細路女要同我地影相.  又係笑容滿面.  對比之後開羅見到人人黑口黑面, 一係成個奸商樣的感覺相差好遠.

我地只在車上隔住窗睇龐貝石柱(Pompey's Pillar). 導遊話要俾入場費入去睇唔係好值囉...既然佢都咁講大家就隔住個污糟到爆的車窗係咁影係咁影....

夜晚去了一間對住giza 金字塔的餐廳食飯, 對住金字塔食飯, 真係一世人都未必有一次呀!!!(原來仲有第二次架) 抱住顫顫驚驚的心情去食那個”雞扒”晚餐, 竟然係雞脾呀!!!!太感動喇!!!! 熟悉我的人都知我平生最憎食雞胸. 響埃及日日CHICKEN OR FISH, 每一日都抱住賭一鋪的心情去食飯!


忍不住叫左支sakara 啤酒賀一賀佢! 可惜支啤酒換左都仲係暖的….
聽日就係重頭戲---庫夫金字塔同獅身人面像喇. 5:30am點morning call 要早d抖!

魔西的入埃及記 10/12-19/12 Day 1

前言

先解釋這篇遊記的名稱由來:  魔, 是同行朋友的簡稱, 西, 當然是本人謝西嘉,
2010年最後的旅行. 第一次的長途旅行(上次training 唔算啦), 第一次到非洲…出發前充滿期待. 但此次旅程卻係有史以來最多災多難的旅行. 從未試過旅程去到一半就有exhausted 想番香港的感覺. 差不多每一日都有意外或驚嚇事件發生. 沙塵暴水浸又痾又嘔又發燒撞馬車壞飛機要轉過另一架因而Delay4小時, 攪到去杜拜的時間只剩2小時整團人一落機就響機場狂奔, 只花不到半小時全部36人已離開immigration(超快!!!!), 因為發燒冇坐船遊地中海未能見到珊瑚海豚, 在洪加達其他人住海景房我地分配到長洲東堤小築房企位浴缸只有4個階磚咁大, 仲未講休息3個月冇探訪我的姨媽突然在某日坐3個半小時長程車中途不能上廁所的那一刻突襲……

最早一日的morning call為3點, 最遲為6點15分. 需要的體力和精神比平時番工多十倍………….同行者全程大部分時間腦裡保持空白不停食瞓基本上好寧靜的旅程…… 埃及的神殿金字塔等等無疑係非常值得一看但已經謝到乜都冇心機睇……

以往去旅行搵旅行社, 離不開康泰永安東瀛遊, 今次去埃及卻揀了金怡假期. 點解金怡?
原因有二:
1. 金怡假期主打埃及團, 一個星期有兩團比其他旅行社密好多. 我地今次必定要12月10日出發, 冇其他旅行社可以配合到.

2. 金怡的selling point 乃係開羅到亞斯旺的一程坐飛機, 唔同其他旅行社的12小時火車冇得沖涼. 另外洪加達飛開羅亦係坐內陸機, 唔洗坐長程車. 咁樣坐飛機就當然會貴d啦, 但好彩揀左金怡, 否則以我痾足大半程的情況仲坐長途巴士就認真大件事!

當初去金怡假期報名, 對金怡的印象非常差,首先佢地只收現金/支票確實唔方便.  第一次去拎資料時的職員同埋第二次去報名時坐counter 的先生實在態度囂張, 全程表現不耐煩. 點知開茶會又撞正佢而佢亦表示帶團去埃及去左”五十幾次”, 當時心想如果佢係領隊就真係弊…… 非常幸運地領隊唔係佢… 我地領隊Patrick十分專業. 每日都好有耐性再三提醒morning call時間行李收集時間食早餐時間和上車時間, 集合地點亦三番四次的提醒又提醒而唔會表現不耐煩. 非常熟悉埃及的神話故事及歷史(不過聽極都唔記得). 最後一日亦多得佢的安排令我地如願以償不至於敗興而歸.

Day 1 10/12/2010 下午四點機場集合, 快速掃了團友一眼, 並冇單身俊男, 呢次旅行可以疊埋心水集中睇風景….

乘坐18:55 TG639飛曼谷機場, 8點多9點到埗後, 辦好登機手續響機場行左一陣, 00:50 乘坐MS961埃及航空從曼谷飛開羅.

\
(開羅機場)

埃及航空比較舊但座位尚算闊, 最差係電視唔響前面椅背囉……….不過鬼咁眼瞓都懶得睇. 第一日就響睡夢中完結.