2008/11/30 高雄墾丁海角七號之旅 Day 2

DAY2

今天將會去墾丁. 由高雄去墾丁要兩個小時左右(應該係卦, 我冇計住)
差不多到墾丁的時候, 就會一路見到海. 水連天, 唔同深淺色的藍和綠, 好靚! 響巴士上隔住玻璃都忍唔住影左好多相.

越途都是海

途中經過福德宮, 導遊話係一間供奉土地的廟. 求簽好靈! 神婆我當然唔執輸求番支啦. 但導遊話, 呢度求簽都有特別規矩, 先要問聖杯. 問準先可以求. 只能擲3次,黑起上黎3次都唔得就今日唔準求.
咁嚴格??!!!!
好彩我一擲, 就擲到一陰一陽, 可以求得. 我當然係問幾時搵到工啦..........
簽筒同我地一向見到的唔同, 係好大個坐地的. 我在大簽筒一抽. "一號!!!!?????????"
我拎住支簽, 睇左幾次, "真係一號喎!!" 以我多年經驗, 我唔洗拎簽紙都知係上上簽啦.
古人係"漢高祖入關". 唔洗睇內容都知好到極. 希望係啦. 我真係好需要好運!

在福德宮, 有個滿頭白髮的婆婆, 用非常流利的日文問我"由日本黎架?" 那時候我突然想起海角7號呢部電影....

食左一餐普通過普通的海鮮餐就去貓鼻頭. 呢個景點我睇旅遊書都有介紹, 但唔知點解大部分香港旅行團都唔放入行程? 可能覺得香港人唔會咁無聊專登睇舊石, 而且附近乜都冇,唔順路去其他景點?

下一個景點, 是墾丁國家公園. ?? 行程紙好似冇架噃? 我當時心諗, 正呀, 多左個景點!! 點知, 係惡夢的來臨.....

無可否認, 社頂自然公園的一段路, 風景好靚. 好多蝴蝶, 不同種類的雀仔, 岩石形狀奇特, 值得一去. 可惜, 真係年紀大機器壞, 行到差d 死!!!! 太多的上落斜, 崎嶇不平山路, 仲要穿越極度狹窄裂縫! 窄過張保仔洞! 未行完我已經膝痛, 斜路對膝頭實在太傷! 不過團中有4位老人家真係勁, 行得快過我多多聲, 真慚愧.........
如果鐘意大自然, 墾丁國家公園係一個非常值得去的地方!

下一站, 鵝鑾鼻燈塔! 鵝鑾鼻燈塔, 在台灣的最南端. 在燈塔那邊其實係睇唔到海. 導遊又吞pop 唔帶我地行. 我同老豆只好兩條友去搵那個台灣最南點的雕塑. 兩個腳痛之人急急腳向下行, 行左10分鐘仲未見到海本想打退堂鼓. 但老豆話, 到啦到啦, 見到海喇!!! 我才留意到有海浪聲!!!! 急急腳衝落去, 一轉彎就見到一望無際的太平洋/巴士海峽!!!! 我真係忍唔住發出 "嘩!!!!!!!!!(比起我在台北見到7-11大聲好多 XDD) 海呀! "

老豆話 呢度係太平洋和巴士海峽的交匯, 所以我地見到的海浪, 左右兩邊真係唔同樣架!!

雖然最後都係冇時間搵那個台灣最南的雕塑, 但我相信我已經到左國境之南. 由於已到集合時間, 腳痛父女唯有再匆匆回旅遊巴. 有少少可惜...
由於呢一團唔會留在墾丁過夜(CHEAP 野係咁架喇), 我地架巴士經過恆春古城俾我地睇一睇就出番高雄六合夜市食飯.中途落車去廁所, 咁橋身上有相機影左呢張難得的天文現象.

六合夜市和士林夜市唔同. 六合響街邊掃街, 所以一D 都唔似上次去士林咁侷咁熱. 好彩今次阿媽冇去, 否則佢一定發28次脾氣都搵唔到野食......搵左好耐, 卒之搵到間似樣D 的鋪頭仔食牛肉面, 加多杯苦瓜汁清清熱!
是日行程太辛苦, 九點左右番到酒店都攰到唔想郁! 實在唔能再行其他SHOPPING CENTER, 但又唔甘心咁早訓, 點算呢? 好彩俾我見到酒店附近有書局和屈臣氏!!!!!!老豆自己番房休息, 我就繼續行左一陣, 買左本書, 幾塊MASK 就番酒店.(係, 又係mask)
半夜突然熱醒,訓唔到. 典典下竟然肚餓....餓又訓唔到, 只好起身食餅. 一睇個錶, 4:30AM.....可能嘈到老豆, 佢起身見到我響張床食餅, "肚餓呀?" "係呀...." 佢竟然冷笑一聲!
之後第二日我問佢"尋晚你4點半見到我食餅, 有冇以為我鬼上身呀"

夜市入面有豬賣

十分喜歡台灣的白玉苦瓜汁

<

HEA 爆日本東北之旅-day 5 26/4/2010

昨晚的Tokyo Dome Hotel 於JR 水道橋附近. 如由新宿出發, 需乘坐中央總武線, 水道橋站下車.

酒店就在TOKYO DOME 旁邊. 仲有一個遊樂場TOKYO DOME CITY Attractions. 之前一晚一邊執行李一邊睇電視睇到好夜, 中午食完LUNCH 就要去機場番香港, 所以今日打算朝早在酒店食完早餐在附近的SHOPPING CENTER 行一行便番酒店CHECK OUT.
和團友約好時間食完早餐後一齊去SHOPPING. 先上房間爆個靚石, 望下隻錶--嘩, 仲有咁多時間0既??? 於是又坐在電視機前睇電視. 係咁等係咁等, 悶到忍不住自己走去行下. 行完都未到約定時間, 越諗越唔對路........
望下個錶---頂!!! 原來之前一晚諗住都要番香港, 手錶已經由日本時間轉番去香港時間了!!!!!我以為未到約定時間但原來我已經遲到差不多一個鐘!!!!!!!!

(Lobby樓底好多, 好光猛, like)



(房間望出去的景色)


(Attractions)


(酒店外觀)

撞到其中一個團友, 佢話我知, 那幾個約左我的阿姨們由於等唔到我, 已經一早自己走左去行街......距離集合時間剩下30分鐘左右, 我已經浪費左差不多兩個鐘戇居居在房等時間過, 我點都要趁住呢30分鐘去周圍望下買下野!

摩打腳的周圍行, 見到一個西裝畢挺的伯伯在餵魚. 以極速的腳步圍住酒店行左一個圈, 買左一本雜誌就要check out了....大失敗!!

(導遊話, 黑底白字的McDonald's 係新的, 比較高級d 喎. 玻璃反光可以見到我坐緊的旅遊巴)

lunch 食完一餐普通過普通的鐵板燒就要去成田機場了....諗住響機場可以瘋狂購物, 點知又係買雜誌...
總括呢次旅行, 買野買得好少. 一) 因為yen 貴, 二)因為個喼唔夠大, 三) 因為大部分時間在鄉下地方
在新宿購物時間只得半日, 買番黎的東西差不多九成響香港莎莎卓悅都有, 而且仲平 /.___.\
不過全程處於一個極度relax 的狀態, 自己去到邊度都唔知, 每晚一邊嘆啤酒一邊睇唔知講乜但又覺得好笑的電視, 非常放鬆! 每晚都係無夢都天明, 睡眠質素從未如此的好!

希望每一年都可以有一個單獨旅行的機會, 特別是日本溫泉之旅. 一種特別的感受, 一個不能在香港擁有的私人空間.

• Tokyo Dome -日本首個全天侯多用途場館. Yomiuri grant 主場, 日本人愛稱為big egg ビッグエッグ. 大型競賽如日本職業棒球賽或巨星級演唱會(SMAP)都曾在此演唱. www.tokyo-dome.co.jp/dome/
• Tokyo Dome City Attractions-Attractions 內有大小機動遊戲多達30個, 組成東京都心最大型的遊樂場. www.tokyo-dome.co.jp/attractions/

HEA 爆日本東北之旅-day 4 (仙台, 東京) 25/4/2010

今日下午就會番番去東京喇. 呢幾日除左去便利店買咖啡, 幾乎冇用過錢.
我要去新宿血拚! 殺! 殺! 殺!!!!




(中途停車上廁所,便利店旁的公仔, kawaii)
在仙台最後一個行程-賞櫻

仙台西公園

公園入面的櫻花不算多, 四處走的時候去到一個停車場, 反而d 櫻花開得好靚好多好密!!

賞櫻後就要準備去坐新幹線去東京. 由仙台出發往東京, 坐東北新幹線約2小時14分.


導遊帶我地去到仙台車站就自由活動. 車站連接左幾間大百貨公司, 又係那一句-時間不夠.
牛舌係仙台名產, 在仙台車站有一區係專食牛舌的餐廳, 可惜每一間都好多人. 所以我就走左去某間百貨公司地庫搵食--見到呢一間個menu的牛舌burger 張 相好靚, 而且又有位就入左去---就係呢個牛舌burger. 蠢左....應該普普通通的食個燒牛舌套餐就好啦, 呢個將牛舌剁碎做成burger, 食唔出真正牛舌的味道!!! 賣相一流, 味道咸左d.
到了東京站, 再轉JR, 約四點多去到新宿. 出了新宿站東口抬頭就見到偶像. (呢個廣告響夜晚迷路時救左我一命.)

出發前已經諗定去到新宿就要去tokyu hands. (http://shinjuku.tokyu-hands.co.jp/)行左好大段路搵到之後有d失望. 當年第一次去到神戶tokyu hands 興奮到不得了. 第二日去到大阪再行都依然興奮, 覺得每一樣野都新奇. 但今次去到覺得無甚特別, 好多貨物響香港都有得賣. 花左好多時間一來一回, 距離集合時間越來越近, 快腳衝去最愛的藥房入貨. 可惜人又多, 日元又貴, 買左d sun block 加 eye mask --番到黎香港先發覺莎莎都有得賣!!! 而且仲平!!!@____@
壓抑左幾日冇機會洗錢, 所以唔睇價錢求其亂買一通發洩!!!! 之後再匆匆食碗拉麵就要去到歌舞伎町集合, 點知先發覺donkihotei　（ドン．キホーテ） 就響附近!!!!! donkihotei 係我最中意那一類shop--價錢平, 雜貨, 種類多, 地方淺窄又亂, 有尋寶的感覺.
我決定為左佢, 我番到酒店放低d 野之後會再出黎!
新宿必到之地--歌舞伎町
黃昏的新宿街頭. 木村木村!
康龍拉麵 --地方窄, 店內熱到出汗. 咸左少少, 但竟然食完又唔口渴喎!
tokyo dome hotel
望出去的夜景
小休一陣便再坐JR 番出新宿. 本打算趁某一兩間百貨公司10點收工前趕去, 點知那份地圖資料不夠詳細, 而且新宿JR 車站大到分開左幾個地圖, 東南西北出口都分開曬, 間百貨公司又唔止一間館但地圖又冇寫清楚, 不停要反來反去睇份地圖睇到煩..加上又急尿又著唔夠衫, 搵路搵左幾個字已經放棄. 見到有間藥房又再入左去. 望下望下大部分都響香港有得賣的東西都冇心機行, 決定去番donkhotei, 但又唔知自己響邊....拎番本旅遊書出黎慢慢睇, 正在煩的時候一抬頭就見到木村托哉在遠處望住我!! 個心立即歡呼(真係有!!), 馬上朝住木村的方向行番去東口, 一陣就搵番donkihotei. 在5層(定6 層?) 的donkihotei 行得好開心, 有名牌二手區又有性玩具, 化妝品食物衣服都有, 質數不太高所以價錢都算平(但一兌換番港幣又唔覺得太平囉.....)上上下下行左兩次都搵唔到野買有d唔開心囉....
死心不息買左幾樣(又係番黎見到有得賣)又涷又攰的打道回府. 番到酒店一邊睇電視一邊執拾行李發覺----點解d野裝唔落去!!!????? 我明明真係買左好少咋喎........
唉, 明天就要番香港了.................

HEA 爆日本東北之旅-day 3 (松島,瑞巖寺) 24/4/2010

DAY 3. 再一次無夢的夜晚. 導遊話今日的景點, 係呢一個團的重點節目---松島餵海鷗是也!
導遊話, 松島的由來好似係伊達正宗定邊個因為瘟疫所以種左好多松樹響密密麻麻的島上所以叫松島. 松島其實唔止一個. 查實連日黎佢都會在車上講一d 日本歷史: 東照宮係邊個邊個將軍建造, 織田信長又點點點, 伊達正宗乜乜乜......我一句都唔記得, 完全唔入腦! 其實我幾乎去過邊度都唔係好記得..........寫呢個blog都要睇番d相先知道自己day 幾去過邊! 學老表話齋, 呢d 就係真正的放假! relax 到唔想用腦, 而且亦非常自然地想用都用唔到. (每日都幾乎唔記得幾點集合, 精彩事仲響last 一日發生)


第一站,鹽釜神社賞櫻. 由於呢幾日仙台落雨, 好多花瓣都已經打曬落黎. day 4和團友講起vancouver 的櫻花,我覺得好靚好難忘,漫天櫻花瓣飄落, 浪漫到呢----直到踩上車那一剎那俾人鬧:你刷乾隻腳先上車啦!!踩到我成塊地氈都係喇 !!!但團友話, 日本櫻花顏色淡好多架! 係咩?? 好似係噃.

(鹽釜神社)














賞完櫻便到了松島, 坐船出海. 船上有廣播, 介紹松島. sorry, 咩話? 聽唔到, 因為人人掛住餵海鷗!!!

下面一張相係經過多次被啄手之後掌握到竅門先至咁瀟灑........

(松島)

之後再行左去五大堂*...名都唔記得, 睇番相先知.除左歷史耐之外, 唔知有乜好講. 求其曬左幾張相, 就行去瑞巖寺*.

又係, 唔知有乜歷史同有乜特別. 睇黎我要google 一下到底我今次去的地方有乜特別同歷史先得了............
下午松島的蠔餐. 兩粒咁大把. 但既然又飽喎

3點多, 到達岩手縣. 去了盛岡手造村. 呢個手造村由岩手縣政府協助開設, 以推動地方產業為目標. 入面有15個工房, 集合左一d 日本傳統手工藝,(e.g. 傳統玩具糖果,煎餅, 打鐵etc) 可以睇住佢地做, 又可以幫襯買野咁囉.
行左一個圈已經悶到嘔, 走去同一個日本大叔吹水(應該係農民), 我企響佢檔口面前一邊試食漬物一邊傾計, 不停俾我試食, 仲裝埋飯俾我食, 攪攪震冇幫襯大叔冇黑面, 超nice!! (最重要係大叔讚我日文發音きれい！！呵呵呵! 雖然講得唔流利但我覺得我發音真係好過領隊囉!!

4點幾就番酒店, 今晚住的是森之風溫泉酒店. 因為呢間酒店好大溫泉都幾靚, 大家浸一浸再去慢慢食飯. (都話呢個係超hea 團)

http://www.morinokaze.com/

終於響呢間森之風溫泉試到露天溫泉.酒店在山上, 從溫泉可以遠眺雪山, 好舒服好嘆! 我懷疑我以前都浸過露天溫泉,不過可能以前浸的時候多數是天黑, 又或者大近視所以一d記憶都冇...........
自從第一日開始, 每一日去溫泉都撞到d團友..............由尷尬不自在慢慢變到無奈同冇辦法是鬼但....

呢個露天溫泉望出去的景象就好似我個房望出去的景色.. 遠山仲有一d 積雪.

大部分人都浸完先食飯, 著住套浴衣周圍行




房間有d 舊的感覺, 不過一個人一間房就饒恕佢!

秋刀魚, 天婦羅, 牛肉都未入鏡,非常豐富的一餐

飯後酒店仲有太鼓同製作日式年糕的表演. 我望一望觀眾, 平均年紀約有70.歲............我幾乎是全場最年輕.

呢幾日響街, 見到的人大約年齡50歲或以上.................

是晚忘記飲啤酒, 但一樣好好訓.

• 五大堂-現存東北地區最古老的一座桃山風格建築物, 由伊達政宗於1604年建成. 所謂五大堂,是指堂內供奉了五位不動明王的意思. 地址: 宮城郡松島町松島町內111

• 瑞巖寺-公元828年, 由慈覺大師開創. 現時主要建築物都是由政宗公親自監督修建而成. 地址: 宮城郡松島町松島字町91內