090909 毒女與孻女的北京之旅

無情白事某星期日, 毒女(即本人) 與孻女(即魔二) 失驚無神的在5分鐘之內決定了去北京.

由於二人皆懶到爆, 冇人諗過去自由行. 儘管身邊不少人不停發表北京可以自由行的偉論~係, 我知, 邊度唔可以自由行?(我估北韓吧)只不過我唔想plan, 魔二? 算吧....買了北京旅遊書揭了兩頁便將本書交俾我叫我睇, 本書而家仲響我屋企!! 我都係睇左幾頁..........

090909, 09:09, 在香港機場準備入閘.

上午十點多國航飛北京, 飛機餐甜品竟是haagen dazs 雲呢拿雪糕!!

落機後馬上去睇水立方和鳥巢. 水立方的表面原來真係一塊膠膜!! 未去之前對水立方有好大期望, 入到去原來好細!!! 相反鳥巢就壯觀好多!!

第一日北京天氣非常好, 藍天白雲秋高氣爽. 雖然有d 曬, 但一d都唔覺得熱. D 風吹來好爽, 完全同香港唔同感覺, 非常正!!

由於跟團的關係, 晚餐都唔會expect有幾好, 不過第一晚食餃子, 都唔錯,因為我好中意食餃子!!!而且那個醋浸蒜頭更加係一流!! 人間極品呀!!!!
食完晚去了王府井大街, 成條街都係名牌冇乜特別. 最特別都係那些會郁的蝎子和炸海星!!!!

酒店係5星, 設備果然唔錯. 最令人"吃驚"係廁所同床之間那個大玻璃窗......................................

兩條友馬上撲向廁所那度百葉簾, 睇下有冇繩之類的物體去較百葉簾的角度.

係冇.

睇得清清楚楚.

唯有響浴缸上面掛條繩, 晾起條大毛巾遮一遮啦.

當本人響如此先進又大又靚嘅廁所辦完大事洗手時, 赫然發現那塊小圓鏡下面有個電制.

八八卦卦按下去., "轟轟轟" 的響左幾下.

咦,到底係邊一度郁左呢?

再按多幾次先.....我再左望右望竟然見到那塊百葉簾的角度改變中!!

原來先進到咁...兩個鄉下人仲去不停搵繩諗住拉個百葉簾.....好彩發現得仲算早, 我仲未沖涼.....

呢一晚, 好早就訓左.....張床好舒服.....