BARBAPAPA 巴黎尋根之旅 DAY 1

Barbapapa 尋根之旅 day 1

25/6/2011  星期六

在倫敦完結左一個星期training, 今日搭14:02 的Eurostar 火車到巴黎. 車程兩個多小時, 英國和法國有一小時時差, 到巴黎變成5點幾.
上午check out左之後,去左St Pancras Eurostar station 拎車飛. 

來回巴黎, 二百幾英磅

由於之前已經響香港online 買左飛, 去到出示credit card 就可以拎飛.  拎完飛,馬上過關坐響lobby 等上車, 因為指示話有大件行李應該早一小時去ready所以咪早d 去囉.  我以為好似飛機咁要寄倉啦, 點知同普通坐火車一樣都係成班人坐響lobby 等. 一見到指示牌顯示可以上車, 所有旅客都湧去月台. 我坐得比較後所以好遲先湧到上月台, 加上我坐coach 1 即係最前一卡, 拉到個行李去到所有行李架已經被霸佔!!!! 非常十分狼狽的情況之下, 只能求其搵個位”攝”件行李…全個車廂的人都望住我點樣好似一個癲婆咁搵位,..不過我都未算最狼狽. 有人掛住搵位擺行李連個手袋放左響我旁邊個坐位都唔知!!

一早去左等上車

第一卡..行到抽筋

放行李空間非常少

睇左一集日劇, 小眠一陣已經到左巴黎Gare de Nord北車站. 

之前英國某法藉同事叫我坐的士去酒店, 因為人生路不熟仲有件行李, 而且巴黎的士冇倫敦咁貴, 都係建議我打的. 排左好耐先上到的士, 遇著個黑人女司機. 佢望住個地址一陣, 講句ok 就叫我上車落錶. 點知落左錶行左一分鐘佢叫我:”madame, excusez- moi?!”示意我俾多次個地址佢睇---喂乜你唔係識先叫我上車!? 你咁樣同bangkok d 司機有乜分別呀????

佢不停衣衣哦哦自己同自己講野, 又不停將地址輸入個GPS 導航, 都出現唔到個位置……我, 開始標冷汗.  唔通BOOK左間唔響PARIS 的酒店?? 我係唔係上錯賊車?? 最慘係完全雞同鴨講完全唔知佢做乜. 我識d唔識d隱約聽到佢話好似唔響PARIS…吓!!!????  架車兜兜轉轉, 個咪標係咁跳, 我個心又係咁跳…跳到7個幾EURO司機終於同我講佢知點去喇…..7個幾呀, 八十幾港紙你先同我講你識去!!!????? 但, 我可以點!!!!????

我一邊坐車一邊周圍望, 突然眼尾見到有一舊好大的烏雲響行人路飄過!! !!! 我馬上轉身望清楚, 原來係有個非洲女人d頭髮電到好爆, 大到好似一舊雲! 我冇誇張, 我估佢個頭髮直徑有2呎!
呢位燥狂女司機一見到塞車就鬧, 一見到人地慢車又鬧, 去到酒店門口見到人地泊車阻住佢又鬧…但人地落車同佢理論又馬上死狗咁樣喎.  卒之到左酒店, 盛惠17 ₡!!

唉, 都好d….響倫敦call 架車由酒店King’s Cross Station 都收我廿磅啦! 

book左間holiday inn garden courts st-ouen, 攪掂check in 手續上到房, 嘩, 好整潔好大張床呀!!!! 如果呢間房響泰國絕對是一般貨色, 但響巴黎我就覺得喜出望外. 因為對比起london 間酒店實在靚太多喇!

放低行李休息一陣, 7點幾天色仲好光, 於是決定出發最多野睇的香榭麗舍大道 (Avenue des Champs-Elysees), 加上由酒店最近個metro station 去Champs-Elysees 係唔需要轉車, 夠曬方便!

最近酒店的站-PORTE DE SAINT-OUEN

少數有幕門有冷氣的地鐵站-champs-elysees clemenceau

一出到Champs-Elysees Clemenceau站已經見到好多人.  望下望下已經見到凱旋門 (Arc de Triomphe).  既然都見到, 都唔會好遠啦, 所以就決定慢慢行過去. (一邊行一邊影相仲買埋macaroon, 都行左45分鐘…)



Laduree--很多人排隊買macaroon. 大部分是亞洲人



沿途好多人好熱鬧好熱好曬, 其實已經好肚餓但又唔想響Champs-Elysees D cafe食因為好貴, 而且好多人等緊位.  經過Laduree 停低買兩個Macaroon頂下肚就繼續向著夕陽進發. 

laduree 的店員非常難得地有禮貌. 左邊的男店主(員?)友善親切

去到凱旋門影幾張相之後就搵人幫我影幾張啦.  第一次個鬼婆影完, 咦, 點解個人咁大, 又影唔曬個凱旋門0既?  以為佢年紀大唔識用相機咪搵第二個後生女, 第一張鬆郁朦, 第二張, 又係個人咁大0既?? 已經冇zoom in 架喇喎??!!! 我當時真係覺得好無奈, 點解想搵一個人影一張正常的到此一遊照都咁難!

唔講都唔覺我響凱旋門前面--塊面超圓

行下行下搵下餐廳去下sephora(開到半夜12點)又行下其他shop, 十點幾先搵到一間似乎有位價錢不算太貴的sandwich shop食dinner. 一個penini+ 一支水, 盛惠₡7.05.  似乎, 月薪冇港幣3萬響巴黎應該好難生存…………第一日已經行到好攰, 11點幾先打道回府番酒店…

夜晚的凱旋門好靚......