Barbapapa 巴黎尋根之旅 Day 3

Day 3

之前一日實在太攰太攰, 今日決定訓晏d, 結果10:15am去到餐廳已經過左早餐時間.  我衝到入去見到一個肥嬸執緊檯, 但我見到仲有好多面包未收, 咪拎個牛角包, 沖杯茶飲囉.  點知個肥嬸見到我大模斯樣過曬時間食早餐, 表現出極度不滿及卑視仲想打我一鑊的表情!  毫不掩飾佢的不滿反曬眼!!! 佢十分鐘都執唔到一張檯十年都未執完啦, 我坐低食個牛角包唔洗5分鐘佢洗唔洗咁樣?


匆匆忙忙食完早餐, 立即出發到今日第一個景點:  聖母院大教堂(Cathédral Notre-Dame de Paris).   今日天氣依然極熱....行上行落地鐵的樓梯令我面臨崩潰的邊緣.


坐4號線metro去到 cité站, 左望右望決定跟住一堆人行, 好快就見到Notre-Dame.  遠遠已經見到一大條人龍等入教堂.  十一點左右的太陽曬到頭暈, 望見好多大陸遊客擔遮我初初都有d 猶豫, 但當我見到排後面的鬼婆都擔遮我決定將我把遮出鞘!! 太熱太曬喇...真係好辛苦....烈日之下排隊真係令人發狂.... 


聖母院比聖心堂更靚.  最吸引我就係教堂內的彩繪玻璃窗.  外面正面有三道門, 每一道都有精緻的雕刻.


北邊的玫瑰窗



雖然我唔係教徒, 但我用euro 5帶左佢番香港

又再一次叫人幫我影相, 又再一次失望.   百思不得其解點解個相機會zoom 得咁大之際突然見到有個字出現響相機個screen----2X ??????咦, 點解會zoom左?????? 左按右按發覺唔知點解部相機原來開啟數碼變焦???????謎底終於解開!!! 原來之前兩日點解D 相全部影得咁大就係咁解!!!!!!哎真係激死!!! 點解佢會自己開左數碼變焦? 我都唔識攪, 一定係之前老豆拎去整的時候cannon d人整成咁! 不過都好, 終於都回復正常. 


<><><><><> 

相機終於變番正常

影左一堆相, 求其買左一個Panini (三日內的第二個) 坐響街邊食就決定離開Notre-Dame.(街邊有尿咪...)  但, 去邊呢? 點去呢?  我真係好攰呀, 天氣又熱, 我唔想行路喎!!!  metro 又要行樓梯!!!行行下見到一排單車, 好想試下響巴黎踩單車, 但我摸一摸個座位---嘩, 坐上去真係煎熟我屁股!!!

於是, 無奈地決定俾28euro, 坐L'OPEN BUS 遊巴黎.  上到車俾50 EURO 個女司機, 佢講左一堆法文完全唔知佢想點.  但睇佢個樣明顯係唔想做我生意.  我唯有諗佢係冇散紙啦....無奈地落車有一對疑似美國人夫婦好熱心咁了解我發生乜事"俾人趕落車". 我話: 我唔知因為我完全聽唔明!!  可能佢冇散紙???那個男人話, "冇可能! 就算係佢可以叫你俾Credit card!  This is very bad!"係喎佢又講得0岩!! 之後又有一架巴士黎我幾經艱辛逼上車, 前面個遊客俾credit card 唔知點解攪左好耐好耐, 輪到我俾錢個司機又唔做我生意趕我落車!!!佢話: the next bus is coming! you go to the next bus!" 喂點解又係我啫!!!!我真係嬲到爆, 但唔知點解我又落車囉!!! 不過我睇架車又真係好多人.. 好無奈到第三架車先上到去, 個司機哥哥笑容好好條氣先至順番少少..........唉, 好差好差, 我對法國人的印象真係好差!

坐呢d 巴士當然要坐樓上睇風景.  嘩, 熱到呢, 曬到呢, 戴住太陽眼鏡我都覺得睜不開眼.  走到最後一排, 完全不怕核突的撐開我把遮, (我見之前都有人擔遮我先至擔咋)但都無法遮擋太陽的熱力. 又想影相又想遮太陽攪到非常狼狽.   天呀, 真係好熱呀!!! 唔好話坐一日, 我覺得我坐多15分鐘都頂唔順, 點算???

 

熱到快蒸熟了

巴士去到協和廣場(Place de la Concorde) 我就落左去影相.  當時都奇怪, 話曬協和廣場都係一個出名景點, 點解會冇人落車?  當我隻腳一踏出架車感覺到熱氣我已經後悔.   坐響車上面, 熱極都會有風因為架車會行.  但落到車之後冇遮冇擋冇樹蔭, 太陽直曬氣溫我估有38度! 

但諗諗下協和廣場話曬都咁出名, 算啦, 去影幾張相啦.  反正買左車飛一日都無限次上落咯.  唉, 但係明明好短距離都行左好似好耐.  好似去左火爐一樣!

由相機個鏡頭望出去乜都見唔到, 因為太陽太猛!! 冇乜興緻快快手影左幾張相, 馬上番去巴士站等車.  巴士站又係冇遮冇擋直曬, 企兩分鐘都會中暑.  無奈地, 好肉酸都冇辦法, 我決定擔住把遮企響地鐵站口等巴士.  緊兩分鐘又要行上地面睇下巴士到左未. 如是者, 上上落落等左廿分鐘 (!) 第二架巴士先至到.



方尖碑,1829年由埃及所贈



 

呢個就係我的庇護所地鐵站入口...要行到好入先至唔會曬到

由協和廣場沿著香榭麗舍大道直行, 就會去到凱旋門. 天氣涼的時候就會幾好, 但我行多兩步都想死......

由於之前覺得巴士上層太熱, 我決定坐下層.  但, 咁並唔代表唔熱. 只係冇咁曬, 但一樣熱!  巴士下層, 當然係冇冷氣, 而個窗都係超細......下面塊大玻璃係唔可以郁, 只會上面一塊細玻璃係可以打開! 熱過香港d 冇冷氣巴士! 香港熱狗巴都仲可以開窗吹吹風...... 

\

上左巴士, 去番香榭麗舍大道, 馬上去搵廁所.  呢幾日行左幾次香榭麗舍大道, 知道有兩間sandwich shop 唔係好旺, 廁所通常都冇乜人等, 所以成為我每日必到之處(呢一日3次!!)一落車, 發覺自己d 汗已經由背脊流到小腿....成條褲都滴水!   

就係呢間餐廳!

最愛的Monoprix.  夠平又方便, 又開到好夜!一日行3次!

去完廁所, 再去至愛的monoprix 補給物資---水是也! 呢幾日買水都買到窮, 搵到間響champs-elysees 的monoprix 當然要日日幫襯! 買左支1.5L的水, 放入背囊, 重都係咁話, 要慳番D!
monoprix 有女裝,飾物,化妝品護膚品地庫仲有超級市場, 為每日必到之處!

上番Open bus 坐到去Invalides 由綠色線轉藍色線巴士去巴士底(Bastille), 聖哲曼德布雷教堂(Eglise St. Germain des Prés) 一帶.  響Invalides(傷殘戰士之家)等車, 又係熱到發癲, 影幾張相完全部Out focus 都唔知因為太陽猛到我睇唔到野!

我響呢一刻決定, 我唔會再落車, 除非要轉線!!!!

何謂轉線?  Open bus 有3條路線, 會去均Paris 主要景點.  要轉車就必須在某幾個車站落車再轉車.  綠色為主要景點如:  凱旋門 (Arc de Triomphe) ,香榭麗舍大道 (Avenue des Champs-Elysees) , 艾菲爾鐵塔(Le tour Eiffel) 等等.

藍色主要為塞納河左邊, 如Invalides (傷殘戰士之家),巴士底 等等.  紅色為塞納河右邊, 如瑪德蓮教堂(Eglise Ste-Marie Madeleine), 加尼葉歌劇院(Opéra Garnier), 蒙馬特等等.

坐響熱狗入面, 一面出汗一面從窗口窺看巴黎的景色.  沿途經過巴士底廣場(Place de Bastille), 巴士底歌劇院( Opéra de Bastille), 龐比度藝術文法中心(Centre National d’Art de Culture Georges Pompidou), 畢卡索美術館(Musée Picasso) 等等.  其實我好想去畢卡索美術館, 但生命值已接近零.  所以決定留守熱狗之內, 完完全全浪費左車飛.

塞下車, 已經到左六點幾.  又去番聖母院站轉綠色線去Avenue des Champs-Elysees.





聖母院的另一邊



等左好耐先等到綠色線.  不論什麼人種全部爭先恐後湧上車.  不斷給後面的人係咁推, 心火盛的程度已到達頂點.



本打算去完廁所之後再坐紅色線, 但由於已經過左尾班車時間只好放棄.  唯有再去Avenue des Champs-Elysees 的monoprix和藥房 shopping! 買左少少野, 覺得肚餓於是去搵餐廳.  之前幾次行完藥房都會轉右出番Avenue des Champs-Elysees, 但今次突然轉左, 竟然發現一間玩具店!  一入到去就見到Barbapapa 的counter!到左Paris 咁耐第一次覺得興奮. 玩具店一共3層, 只有地下有一個小小的corner 專賣Barbapapa.  左揀右揀買左幾件, 非常滿意地離開.

由於第一日人地幫我影d相比較失敗, 所以再次行去凱旋門補番幾張. 唔覺唔覺又行到九點幾先至去食晚飯.  但我完全已經冇記憶自己食過d乜……不過除左面包仲會係乜呢….

到第三日我已經覺得自己黑左好多. 成個難民咁樣