Barbapapa 巴黎尋根之旅 Day 5-挑戰一日DAY PASS!

今天決定要來一個"一張全日metro day pass 玩足12個小時"的創舉!   第一個景點係羅浮宮(Musée du Louvre).   羅浮宮九點開門, 我響10點前已經到達, 準備排長龍.  但出乎意料之外等左少過10分鐘就過左安全檢查, 進入羅浮宮買入場劵.  搵到信用卡賣票機唔需要排隊, 1分鐘就買好入場劵進入展覽館. 
拎左份博物館導覽圖, 趁仲係人少少先出發到Denon (德農館).  因為大部分比較為人熟悉的藝術品都集中在Denon. 例如: 蒙娜麗莎, 拿破崙一世加冕大典(the consecration of Emperor Napoleon I), 勝利女神(The Winged Vicotry of Samothrace), 維納斯(Venus de Milo).  入去之前就見到如此洶湧的恐怖狀態---有冇發現到d 乜野??? 相中人全部黑頭髮!
 

勝利女神

Denon入面真係有好多好多好多的國內遊客. 當我行左一陣就發覺左一件事:  如果想去重點展覽品的話只需跟著遊客們.  因為佢地時間唔多所以只會集中睇重點推薦所以響重點區域就會比較"熱鬧".  一過左重點展示品就會發現整個地方冇曬人!

從展覽館望出, 羅浮宮好靚!

唔駛多講, 最多人圍的一定係蒙娜麗莎.   無數人遠距離的圍著影相, 偏偏就有一對疑似香港人情侶霸佔著最前一排不停影相再加自拍. 自拍完之後又唔滿意又再拍, 完全冇理過後面有百幾二百人響後面等佢地走開, 因為張張相都影到佢地兩個!!

咁多日響巴黎, 行得最舒服就係今日, 因為羅浮宮入面有冷氣!! 太好了!!!!

四處逛去到埃及館.   突然去到一個地方圍滿人狂影相, 我根本冇辦法擠過去, 發覺佢地狂影的係一個好大的法老王頭像. 本人突然冷笑心裡面講左一句: "哈, 再大d 你地都未見過, 大驚小怪!" 講完都覺得自己好白痴 XDDD

響羅浮宮入面, 大大隻字寫住唔可以用閃光燈. 但我發覺係冇人理.  職員見到都唔會理, 同英國d 博物館好唔同. 響英國, 閃光燈一閃已經有職員想食人咁樣行出黎阻止!

VENUS DE MILO

Psyche and Cupid

Captive (the Dying Salve), Michelangelo

Gabrielle d'Estrees and her sister

響羅浮宮行左兩個幾鐘已經開始好攰, 拎住地圖在不停兜圈, 都搵唔到自己想去的地方.....  而且太多野想睇, 而體力已經頂唔順....臨尾決定走的時候, 誤打誤撞去了拿破崙套房.   好華麗金碧輝煌完全係我鐘意的浮誇風格!!
好彩我蕩失路否則就會錯過呢個咁正的展覽品!

Napoleon III appartments

呢度空間感好大, 放左好幾個希臘雕塑.  行到一點幾, 又餓又攰, 決定離開羅浮宮去其他地方行行.



風和日麗又不太熱的一日.  美麗的羅浮宮外

打開travel guide, 和羅浮宮距離最近的景點為皇宮 (Palais Royal).  從前此處為皇宮但而家已經變為高級商店, 餐廳, 文化部等等. 

黎左巴黎幾日, 除左響monoprix 見過有Barbapapa 背囊和筆袋就未見過有其他的玩具.   響皇宮行行下, 見到一間玩具店, 我竟然見到佢!! 老闆仲要用barbapapa 的公仔佈置櫥窗!! 果然係祖藉法國家傳曉的Character!

其中一間玩具店的櫥窗

另一家玩具店.  左邊的大象為新歡

Av. de L'Opera

普普通通一條街上的建築物都咁鬼靚.
Travel Guide 上說皇宮附近有一個莫利哀的噴泉, 反正就響附近打算過去望一下.  入到去細街, 行左一陣望下地圖再望下路牌, 咦, 過左? 但我乜都見唔到?  番轉頭, 再行, 都係見唔到有噴泉嘅? 疑惑中回頭一看, 竟然就響後面!!!!


Fontaine Moliere

 噴泉??? 水呢???? 如果知係咁樣我就唔會專登搵啦. 沿著Avenue de L'Opera 行, 打算食lunch, 但係行過望到餐廳menu的價錢真係冇辦法可以坐低...... 唯有買左個法包企響街邊望住d人慢慢"趙", 因為我牙骹唔係幾好, 食法包真係需要時間慢慢細嚼 (=___=).....
下一站打算去加尼葉歌劇院 (Opéra Garnier).  其實望都望得到應該可以行, 但既然買左day pass 點解唔坐車呢?
一出站, 望行四周的景色, 都係咁鬼靚.....

望過去可以見到協和廣場的方尖碑



加尼葉歌劇院 Opéra Garnier

響歌劇院面前仲目睹左"跌金戒指" 騙局! 原來騙局呢d 野真係世界通行!!  行一站, 瑪德蓮教堂(Eglise Ste-Marie Madeleine)

今日其實主要想要羅浮宮之外, 就係想去聖哲曼德布雷教堂附近的名店街. 

聖哲曼德布雷教堂

 雖說為名店街, 但所有的名店都係非常含蓄地隱藏響小街入面, 行過都唔會知!



Christian Louboutin

 

Maison Martin Margiela



專登去搵Miu Miu但可惜已變成 Celine



其實響呢一帶仲有好多名店, 不過都冇打算去.  因為我要仲要去 Galeries Lafayette (老佛爺百貨公司) Printemps (春天百貨) Shopping!

printemps

 Printemps 同Lafayette都做緊sale.  printemps 有3個館:  男士館, 化妝品館, 同服飾/婦女雜貨館.  我只去左服飾館, 地下一層全部是世界級名牌, 如Dior, LV, Chanel, 店外都係排緊隊.  上左幾層行左女裝部, 有D 都幾靚 例如APC, see by Chole 都on sale中, 但真係貴呢....

lafayette

行左一陣, 見冇乜特別就離開去左Lafayette. Lafayette仲多人, 好多同胞們在血拚.  見到佢地D瘋狂程度會以為減到好平但其實並不.  例如好似減價後我一d都覺得唔平又唔靚的marc by marc jacobs 都大把人好似唔駛錢咁響度搶!  地面名牌店一樣逼滿人覺得冇乜野好睇,  於是我就坐電梯一路上, 睇下會唔會發現有d 特別的貨品.

非常有氣勢的lafayette

突然間想起, 如果去玩具部, 會唔會有好多Barbapapa的公仔呢?  一去到就見到有一個小小的粉紅色corner!! 卒之行遍玩具部每一個角落去幫每一件東西影相.  由於價錢實在貴, 於是只買左一樣野, 其餘的, 影相當作紀念吧...旅途唯一一張自拍照就係響呢度出現.  希望能同大大小小的barbapapa 一齊影相!

下面的係新歡BARBA. 半價之後15EURO. 本來好像帶佢番香港, 可惜佢個SIZE 都幾大, 只好放棄!

 

不經不覺已經8點幾, 天色依然好光.  絕對不能浪費如此好天色, 點算好呢?  於是我就決定來一個鐵塔與羅浮宮夜遊. 因為鐵塔與羅浮宮的日間與夜間景色絕對有唔同的美態. 反正坐metro 都唔駛錢, 當然要盡量坐四圍去!  先在lafayette 附近一家超市買左份三文治做晚餐(唉每日幾乎都係面包), 再加上已經在LAFAYETTE裝滿左一支水(慳得就慳....),. 到鐵塔前先到La Défense睇睇那個稱為"第三個凱旋門" 的新凱旋門(La Grande Arche). (M 1 線 La Défense站. 一出去就見到)

去到, 就係咁囉.

求其搵張櫈坐低就食我個dinner.  差不多晚上10點, 天氣比之前幾日涼好多.  我諗其實正常巴黎天氣應該係咁卦?  信錯左英國的天氣報告又話大雷雨...我應該係plan day 1 or day 2 去羅浮宮之後今日先坐open bus 遊巴黎!! 難怪英國d同事都話佢地d天氣預告通常都係錯0既.....

食完個sandwich馬上去影鐵塔夜景.  我決定從夏瑤宮(Palais de Chaillot) 那個角度再欣賞鐵塔. 由La Défense去的話, 坐M1 線去到 Charles De Gaulle-Etoile, 再轉6號線, 到Tocadero站一出就係夏瑤宮.

雖然已經10點, 但仲未天黑.  並唔係我心目中想見到的巴黎鐵塔呢.  但我已經好攰唔想再等天黑.搵到個位, 影左幾張滿意的相, 趁住未係好夜趕去羅浮宮. 

去到羅浮宮已經差不多十點半, 天色仲有d藍.

今日見過的希臘雕塑, 突然諗: 佢地夜晚會唔會識郁架呢?

唔好睇個天仲有D藍, 其實影完相已經十一點幾! 要打道回府, 因為酒店附近好靜, 咁夜番去其實有D 驚! 因為第一晚十一點幾番去酒店仲未認到路, 出錯地鐵出口四處搵路的時候見到一堆黑人青年.  貌似在交易..另外又見到一堆圍埋一齊吹水, 其實都驚驚地!
今晚是在巴黎的最後一晚. 明天會傍晚番番去London, 結束我的巴黎之旅!
今日由九點幾離開酒店到差不多十二點番到去, 超過12小時!  簡直係恐怖!! lunch 同dinner 都係求其響街食, 全日不停行行行行行行行行, 覺得自己真係發神經!