Barbapapa 巴黎尋根之旅 Day 2

day 2 星期日
之前響London check 過天氣, 星期3,4會有雷雨. 既然咁, 星期3,4就主打室內活動例如去羅浮宮同凡爾賽宮, 其餘日子就室外活動! 響酒店附近st-ouen有一個巴黎最大的flea market (Marché aux puces St-Ouen 聖圖安跳蚤市場)只開星期六,日, 今日就決定先去呢度, 再去附近的蒙馬特 (Montmarte)聖心堂 (Basillique du Sacré Coeur)

去到先知呢個market, 其實由8個不同大小的market 組成, 我估有成個元朗市咁大!! 上至chanel vintage 衫, hermes, LV手袋巨型行李箱, DIOR ,YSL 手飾, 古董傢俱, 報紙, 下至甩頭甩眼公仔講得出都有! 簡直目不暇給!!!!!!!! 特別推薦Marché Serpette, 入面的貨色比較整齊清潔高級, 比較多高級品牌的古董飾物和手袋, 例如7500歐羅的LV巨型行李箱!! Marché vernaison 比較多”立雜”小東西, 比較便宜的飾物, 心口針耳環全部非常吸引有趣. 但天氣真係好熱, 完全冇辦法可以響一個丁點冷氣都冇, 又或者冇瓦遮頭的地方打持久戰…..開始腳痛盤骨痛, 好辛苦, 但係又想行……………. 我估大概走馬看花的行左2個多小時(係, 走馬看花都要2個多小時. 隻馬仲係要好快速度) 先搵到一間餐廳食lunch. 呢, 對住街外曬住太陽那種café呢…食個burger 就冇左十幾蚊euro, 一杯好似神枱燒酒咁大的coffee 要1.6 euro!!! 一路食一路肉赤!

我竟然食唔曬個BURGER!!!

食完個lunch 恢復左1成元氣之後離開st-ouen, 坐metro 到蒙馬特. 蒙馬特位於巴黎最高點, 從聖心堂可以望到整個巴黎市.  響英國已經有幾個同事推薦, 說非去不可!!! 

一出metro, 未搵到去蒙馬特的指示已經頂唔順響附近公園坐響度休息…對腳攰到癲左! 幾分鐘之後見到有一堆人行, 我心諗跟住行一定就係去聖心堂的方向.  果然! 沿住一條斜路一直行, 沿途好多紀念品店, 越行越覺得自己好似去左澳門大三巴!

去到聖心堂, 搵到人幫我影相. 呢位人兄都幾好笑, 又問我借太陽眼鏡戴又擺曬pose嫌我影得唔好係咁叫我影完又影! 都幾老實吓…..到佢幫我影, 又係影到不知所謂….影完再影又係咁!! 乜搵人幫我影張正常少少0既相真係咁難 小休左兩次, 行左一條長命樓梯就去到教堂,而且更可以見到整個巴黎市. 景色係好靚, 可惜我已經接近中暑邊緣. 坐響樹底又再小休先至行入聖心堂. 歐洲的教堂一向都好靚. 天花又高d畫好靚, 玻璃窗更加係我最愛. 多人多到好似趁墟, 圍住教室行左一個圈就離開.

 唔知自己響邊又唔知自己想去邊, 跟住前面一大班人, 睇下佢地去邊就跟住去啦. 跟下跟下就去左聖彼得教堂(Eglise St-Piere de Montmarte) & 特爾特廣場(Place du Tertre).

唔講都唔知呢度係聖彼得教堂!  有個tea garden 響出面

人多天氣熱斜路多, 完全接近中暑的我不斷自言自語嗌好熱好熱, 又急尿又唔知邊度有廁所, 突然好掛住倫敦d天氣! 唔知自己響邊, 唯有一路落斜路諗住離開蒙馬特. 繞過好多小巷經過好多café 終於忍唔住搵左一間pub, order左杯啤酒閃入去慢慢坐兼借廁所. 人人都搵室外曬太陽唯獨我一個箭步衝入餐廳坐. 傲慢的法國女waitress 見我企左響度差不多5分鐘完全冇理過我!! 是為第一次的惡劣經驗, 之後陸續有來!

蒙馬特下午懶洋洋的貓仔

離開Montmartre 前往艾菲爾鐵塔 (le tour Eiffel). 全程最期待的其中一個景點(因為伍姑娘首歌) 當時已經差不多六點, 依然又熱又曬到抽筋. 坐metro 坐到一身汗, 行去 tour Eiffel d汗已經由背脊流到小腿. 諗住搵一個位置, 幫鐵塔影番張"全身相”, 有個鬼佬響我旁邊一齊行, 行行下佢望下相機, 見到差不多就停低叫我幫佢影. 由佢相機望出去見到鐵塔全相, 就叫佢之後幫我影一張. 點知影完之後差d忍不住爆粗. 他媽的有冇攪錯! 只係見到我個頭???!!!! tour Eiffel 呢???我自己望下個鏡頭, 佢又真係冇zoom到喎, 個相機真係影唔到全景喎. 點解點解點解點解點解呀? (嚎叫中)

你話佢想點呢?

影極都影唔到全相!!!

於是我就不斷行不斷行希望搵到一個好的位置. 在懷疑有40度的巴黎我行左差不多有一千米, 終於搵到一個好位置. 與此同時, 相機差不多冇電. 他媽的真係好熱呀….明明人地全部響一千米前已經影到全景點解我要行多一千米呀!早知拎自己部相機啦, 都唔知老豆部相機點攪…係壞左定點呀…. 終於影到兩張相, 曬到缺水都已7點半, 冇力啦, 要休息喇…..老娘決定來一個塞納河船河!

7點幾都仲又熱又多人, 不過都搵到一個位置可以影到個鐵塔喇!!

焗響架船, 又熱又冇冷氣, 全船就係靠船頂幾個窗散熱. 熱到人都癲

乘坐batobus 來一個(以為)浪漫船河. 14euro 一日, 有8個景點可以上落船, 一日之內無限次任坐.

本來諗住7點幾先坐船, 如果一個景點都唔去齋住好蝕喎. 所以我就選左 Eglise St. Germain des Prés聖哲曼德布雷教堂個站落船. 嘩, 簡直係自作自受.!!! 碼頭離教堂幾遠., 不過最重要都係隻船冇冷氣太陽直曬之後仲要行一大段路, 簡直攞苦黎辛. 行到去教堂, 真係要講句”超~~~!!”

呢度都有Laudree

冇野好睇唯有去番碼頭等船, 決定唔會再去其他任何景點, 去番champs-elysees 個碼頭落船食晚飯!!!因為當時已經九點! 好肚餓! 坐響塞納河 (Le Seine) 旁邊, 食住一排已經熱到完全溶化的朱古力(都要食埋佢因為好餓!) 旁邊仲坐住一個阿伯, 真係浪漫到不能呀!!九點幾仲三十幾度的巴黎呀, 幾浪漫呀!

氣勢磅礡的亞歷山大三世橋

晚上十點的巴黎

不過呢, 九點多開始日落的塞納河又真係幾靚0既.  唔係天氣咁熱就好啦.  由碼頭去champs-elysees 會經過個人認為最靚的亞歷山大三世橋, 同埋大小皇宮, 全部都係漂亮到不行的建築物.



從船上影的, 漂亮的塞納河

invalides 傷殘戰士之家/傷兵院

好靚呀好靚呀

grand palais 大皇宮

petit palais 小皇宮

落船行左一大段路先會去到champs-elysees.  見到一間面包店見到冇乜人價錢算做合理就馬上坐低開餐.  又攰又肚餓, 十點幾先至食晚餐..一個硬到不得了的法包, 加兩片乾"爭爭"的salami腸, 一個strawberry tart +可樂, 咁就差不多一百蚊港紙喇.  十一點幾食完個dinner 又再一次坐熟悉的metro 13號線坐番酒店~
真係好攰真係好攰. 十級攰.

一d配料都冇, 乾啃